ORANJESTAD (AAN) – Rainbow Warriors Foundation a haya oportunidad di reuni di Formador, Evelyn Wever-Croes, den cuadro di su encuentronan cu stakeholders externo, den e proceso di formacion di Gabinete Wever-Croes II.
Señor Milton Ponson a elabora den conferencia di prensa, despues di e reunion tocante e resultado di e reunion aki.
Milton Ponson a atende cu e temanan di urgencia pa Aruba, usando e framework di Nacionnan Uni pa islanan chikito, y cu ta aparece den un rapport traha na 2014.
El a toca na extenso e temanan ambiental, algun tema economico, manera e necesidad pa diversifica, y tambe cu a constata cu den e mercado laboral, e derechonan laboral den algun sector a keda mescos, pero den mayoria di ramo economico, e derechonan aki a bay atras. Den e ultimo parti di e ponencia cu el a trece dilanti Formador, el a referi na e problemanan social y el a splica cu siguiendo un modelo cu National Health Service, cu Inglatera a implementa, forza door di Covid-19, Rainbow ta kere cu hopi problema den e social crisis plan, lo wordo atendi den un forma nobo implementando tecnologianan nobo via computer. Por ehemplo, Microsoft tin su meetings, pero tambe usando tablet y hasta smart phones, pa atende cu cliente.
Ponson a agrega cu National Health Service ta duna servicio 24 ora pa dia, pa problemanan psico-social, violencia domestico, y yen di tema cu mayoria di biaha ta cay bao e departamento di Asunto Social, Departamento di Ayudo Psicologico, of ofreci door di servicionan di fundacionnan specializa.
Milton Ponson ta kere cu aki na Aruba, mirando cu tin penetracion halto di sistemanan digital, y practicamente tur hende tin telefon smart phone, ta un opcion pa den futuro, den e contexto di social crisis plan, por wordo ofreci via telefon tambe.
E no ta un ampliacion di loke Rainbow ta ofreciendo aworaki, pero e tin e beneficio adicional tambe cu ora di haci cosnan digitalmente, datonan ta wordo genera y envez di core tras di hechonan, por anticipa cierto desaroyonan den nos comunidad, pa mitiga nan; particularmente, problemanan social cu semper tin cu wordo mitiga, pasobra e bienestar general ta wordo afecta negativamente, door di problemanan social. Tambe a papia cu Formador, riba e necesidad pa introduci leynan local pa duna contenido na tratadonan y a toca tambe e tema cu cierto departamentonan di gobierno tin cu wordo dirigi pa hendenan academico adecua, pa den futuro tambe Aruba por haya fondonan di Nacionnan Uni pa temanan complica, manera cambio climatico, desaroyo sostenible, unda hopi biaha e exigencianan pa colabora den proyectonan, ta cu gobierno mester tin hende adecua cu nivel academico adecua pa ta e ‘counterpart’ pa e organizacionnan of institutonan internacional cu por financia e proyectonan aki.
