ORANJESTAD (AAN): Lo bay tin un cambio entrante September! Esey ta loke Ministerio di Asuntonan Social y Labor hunto cu Departamento di Labor y Investigacion (DAO) a confirma.
E ta un cambio den e ‘Landsverordening beëindiging arbeidsovereenkomsten’ (ley di retiro) entrante 1 di september 2021
E ta un cambio specificamente riba articulo 2 sub a di e Ley di Retiro.
Art. 2 di e ley di retiro ta regla cu cierto grupo di trahado ta exclui di proteccion di e ley di retiro. Por ehempel trahadonan den servicio di entidadnan publico incluyendo empleadonan publico como tambe empleadonan cu ta traha den servicio di gobierno a base di un contracto laboral, docente y maestronan den servicio di un instituto educacional, pastoornan den servicio den e sector di clero y trahadonan cu ta duna servicio domestico na cas di famia priva etc.
Actualmente den art. 2 sub a di e ley di retiro ta stipula cu pa trahadonan den servicio di un entidad publico no mester pidi un peticion pa retiro na Director di Departamento di Labor & Investigacion (DAO) den caso cu kier termina e relacion laboral.
E articulo aki lo conoce un cambio entrante 1 di september proximo, caminda ta cambia e palabra “entidad publico” pa e palabra “gobierno” cu lo significa cu solamente pa e grupo di empleado publico y empleadonan cu ta traha den servicio di gobierno a base di un contracto laboral NO lo mester pidi un peticion pa retiro na Departamento di Labor & Investigacion.
Pues trahadonan den servicio di entidadnan publico, p.e. Banco Central di Aruba, Universidad di Aruba, Aruba Tourism Authority, Serlimar etc. lo haya proteccion di e ley di retiro y den caso cu kier termina e relacion laboral cu un trahado, e dunado di trabao lo mester sigui e procedura di peticion pa retiro na DAO.
Banda di e forma di terminacion aki tin otro formanan riba cual un relacion laboral por termina. Pa e formanan aki no mester di permiso di Director di DAO.
E formanan mas comun pa terminacion ta: (A) Retiro inmediato. (B) Cu aprobacion mutuo. (C) Termina automaticamente conforme e contracto laboral (van rechtswege). (D) Disolucion di e contracto laboral pa hues (ontbinding). (E) Terminacion durante periodo di prueba (mester ta acorda por escrito).
Departamento di Labor y Investigacion ta pidi tur trahado y principalmente dunadonan di trabao pa tene bon na cuenta e informacion aki.
