Militarnan Hulandes cu training con pa ataca cualkier Drone bulando den zona prohibi

DEN HAAG: Awendia e aparatonan bulador ‘Drones’ a bira un parti integral caba di sociedad y den e situacionnan actual di conflicto. 

E menaza cu e mashinnan bulador chikito aki ta trece cune, ta sigui crece.  Pesey tanto NATO y Hulanda ta sigui busca solucionnan pa na resiliente contra e menaza aki.

   Pa e motibo aki, NATO hunto cu e Joint Nucleus Counter Unmanned Aircraft Systems (C-UAS) y tambe e C-UAS Test Center di Defensa Hulandes, pa di dos biaha pa 3 siman largo lo bay tene un training di counter-drone interoperabilidad, y esaki lo bay ta na e base Lieutenant-generaal Bestkazerne cu ta situa na pueblo di Vredepeel na Limburg.

   NATO actualmente ta desaroyando un posible protocol standard pa sistemanan contra-Drone.  E meta ta pa optimaliza e interoperabilidad, e habilidad di traha hunto, y asina e efectividad di e sistemanan counter-drone por wordo optimaliza.

   Durante e training di counter-drone, varios partido manera unidadnan di exterior, industria, y institutonan di investigacion lo bay ta participando.  Hunto nan lo bin cu diferente sistema, incluyendo sensornan pa detecta Drones, y effectornan pa asina desactiva e Drone aki.  Nan lo usa diferente Drone cu actualmente ta forma un menaza y ta un reto pa e sistemanan cu nan lo bay test.

   Menaza di Drone ta aumentando: E desaroyonan tecnologico di drones ta socede rapidamente.  Drones ta birando mas chikito, ta haya mas aplicacion, por bula mas hopi, y ultimo tempo por cuminza bula hasta autonomo.  Pesey mes, forzanan arma como tambe gruponan rebelde ta usando drones como arma.  Nan a wordo usa den varios atake riba basenan militar na Syria, y instalacion di petroleo na Arabia Saudita, y ta wordo usa tur dia den e guera na Ucrania.  Un atake terorista cu drone no por wordo descarta.   Ademas, individuonan priva, sea intencionalmente of no, ta forma un menaza cu e uso di drones.  Regularmente, den un forma indesea y hasta peligroso, e drones priva aki por crea peligro den cercania di Aeropuerto of grupo grandi di persona.

   Counter-Drone Test Center: E asina yama Joint Nucleus Counter Unmanned Aircraft Systems cu su C-UAS Test Center di Defensa Hulandes, cu tin su sede na e base militar aki na Limburg, ta investigando con pa deal cu un variedad di menaza di sistemanan bulador sin piloto abordo.  Entre otro, e Test Center ta investigando ki combinacion di hende, recurso, y forma pa mihor defende su mes di un menaza di drone.  Ademas di esey, e Test Center ta suministra un plataforma pa Defensa Hulandes pa test y experimenta cu diferente sistema counter-drone cu e industria.  Hecho ta cu Defensa Hulandes actualmente tin sistemanan den funcion caba cu ta detecta y interumpi vuelonan di e tipo di drones aki.