Militarnan di Caribe cu fenomenal prestacion na Vierdaagse di Nijmegen

ORANJESTAD (AAN): Manera ta conoci, diferente persona di Aruba a viaha pa Hulanda pa participa den e famoso caminata conoci como ‘Nijmeegse Vierdaagse’. 

Entre nan tin militarnan local di Aruba y Curaçao, cu a bay pa e reto aki.

   E ta un reto pa cana cuatro dia largo, e distancia di 40 kilometer pa dia, y riba nan curpa nan tin material cu ta pisa como 10 kilo.

   Algo bunita pa mira ta con publico, incluyendo mucha chikitonan tabata saluda e militarnan aki cu a keda demostra nan ‘toque humano’ ora di nan participacion.  Y claro cu tur esaki a wordo observa, y na final a conta tambe.

   Nan a ricibi premio como grupo mas disciplina, y tambe cu nan ta esnan cu tabatin e mihor habilidad ora di marcha.

   Esaki ta e di dos biaha sigui cu e grupo di militarnan aki a haya e premio bunita aki.  Pabien y felicitacion cu e bon trabao.  Tur hende ta orguyoso di boso.