Militarnan di Aruba tambe ofreciendo sosten pa eleccion di otro siman na St. Maarten

ORANJESTAD (AAN): Manera ta conoci, Dialuna awor 19 di Augustus 2024 lo bay tin eleccion politico general na isla di St. Maarten.

  Esey a bin debi cu a disolve Parlamento basta liher na luna di Februari cu a pasa.

   Tin 15 asiento disponibel den Parlamento, y pa un partido logra haya mayoria, e lo mester tin 8 asiento.  Cu e resultado di eleccion di Januari 2024, a crea un coalicion di cuatro partido pa goberna, esta Partido URSM, Partido DP, Partido PFP, y Partido NOW.

   Como cu di e cuatro aki, Partido URSM a haya mas voto, nan lider Dr. Luc Mercelina a bira Prome Ministro.  Miembronan eligi a cuminsa goberna dia 10 di Februari, y Mercelina a huramenta dia 3 di Mei.  Pero Gobierno a collapse 18 dia despues, ora cu Parlamentario Kevin Maingrette di Partido NOW a bandona coalicion pa bay den oposicion.

   Mientras tanto pa evita cu lo por tin confrontacionnan e fin di siman aki y tambe Dialuna di eleccion, Mariniernan di Detachement St. Maarten, y Marine Squadron Aruba, ta sosteniendo hunto cu militarnan di Curaçao aworaki e Cuerpo Policial di St. Maarten.

   Hunto nan ta yuda cu mantenimento di seguridad y ta percura cu ordo publico ta wordo sigui tanto prome, durante, y despues di eleccion.