ORANJESTAD (AAN): For di 11 te cu 19 di Mei cu a pasa, militarnan di Aruba y Corsou a participa den e training anual yama ‘Caribbean Strike’,
cu e biaha aki a tuma lugar na Bonaire. Durante e entrenamento intensivo aki, e militarnan a haci ehercicio hunto den un situacion realistico na nivel di peloton.
Nan a haci ehercicio riba terenonan dificil, bao di solo cayente cu temperatura halto. Aki varios asignacion militar a wordo ehecuta, tanto den dia como tambe marduga. E militarnan a practica e.o. emboscada, patruyanan di reconocemento, atake, y accionnan pa haci contacto cu un oponente.
E training a wordo dirigi door di staf di un batayon combina cu e militarnan di Aruba y di Corsou. Durante Caribbean Strike, e militarnan a sigui desaroya nan resiliencia fisico y mental, nan perseverancia y habilidadnan tactico.
Caribbean Strike ta un parti importante di e desaroyo continuo di tropanan di Caribe. Via di e training aki, nan ta fortalece nan cooperacion, profesionalismo, y preparacion pa futuro operacionnan.
