ORANJESTAD (AAN): Recientemente, Aruba Tourism Authority (ATA) tabata tin e placer di por a ricibi bishita di famia Stohler di New Jersey
cu a experiencia nan vacacion na Aruba den promocion cu The Ritz Carlton Aruba. Scott y Collette Stohler ta un pareha cu ta biaha hunto cu nan yiu pa comparti nan experiencia via plataforma social.
Durante di e bishita na Aruba e famia a explora diferente area di di e isla cu por a ser mira back den potretnan y videonan publica. Di tur e publicacionnan, e video cu mas a resalta ta di e baby cu ta conta den su perspectiva con el a pasa su vacacion na Aruba. E areanan explora pa e famia ta inclui; bishita na pool, Butterfly Farm, Baby Beach, Eagle Beach, Muralnan di San Nicolas, Mangel Halto, y mas. Durante exploracion e famia a cumpli cu diferente actividad manera snorkel, kayak, paddle boarding, exploracion general, y mas.
Nan pagina di Instagram Roamaroo tin total di 226.000 siguidor, y e promocion aki pa Aruba a ricibi un acohida grandi, no solamente pa siguidonan di e pagina, pero tambe pa otro usuario di red social.
Durante fin di siman por a nota cu e video di e baby a worde comparti pa varios residente di Aruba, cual ta duna indicacion cu e promocion aki a worde bon acepta.
Pa esunan cu ainda falta pa wak e video, A.T.A. ta comparti pa asina abo tambe por mira esaki.
