ORANJESTAD (AAN) – E director di Organizacion Mundial di Salud (WHO), Tedros Adhanom Ghebreyesus, a pidi dialuna di e siman aki, a pidi tur pais pa redobla e esfuerzonan pa pone fin na e pandemia,
y a pidi cancela e festehonan di cambio di Aña, pasobra “ta miho celebra laat cu celebra awo y lamenta despues”.
Director di WHO a expresa cu “2022 mester ta e aña unda por caba cu e pandemia”.
Manera ta conoci e propagacion di e virus a dal un golpi fuerte na e mercadonan y e prijs di crudo a cay na un 5%, mientras cu e bolsanan europeo ta operando cu perdida, den sintonia cu e tendencia na Asia.
Dilanti e avance di e variante omicron, Hulanda a drenta den un confinamento nobo, Paris y London a cancela e celebracionnan di Aña Nobo mientras cu Alemania preve endurece e restriccionnan sanitario pa e fechanan aki mes, segun informacion difundi pa AFP.
Tin informacionnan cu tambe na Aruba ohala e comunidad tene cuenta cu nan. Autoridadnan pafo, ta coincidi cu omicron lo por bira e variante dominante na Union Europeo, ya pa mitad di Januari, mientras cu tambe na Merca tin hopi preocupacion cu e desaroyo di e ultimo dianan aki, cu hopi caso di e variante detecta.
Ya caba Gobierno di Israel a prohibi viahenan na varios pais europeo considera cu riesgo halto di contagio y posiblemente Merca lo wordo prohibi tambe como destino.
E Foro Economico Mundial, previsto pa tuma lugar di 17 pa 21 di Januari na Davos, Suiza, a wordo posterga. Na America Latina, Colombia a caba di anuncia cu a wordo detecta e prome tres casonan di omicron den viaheronan procedente di Merca y Spaña. E Ministerio di Salud di Argentina, a informa cu e casonan di covid-19 a multiplica cinco biaha mas den apenas un luna, yegando na 5.337 contagio.
Berdaderamente, Aruba como receptor di turistanan di tur continente, mester ta hopi cauteloso y ta bon pa e comunidad keda atento, sigui vacuna, ricibi e booster cu awor ta mustra cu ta bay bira na nivel nacional, danki Dios. Ban hopi cauteloso cu celebracionnan di fin di aña, ban percura cada ken pa su salud y e salud di esnan rond y di henter comunidad. Den man di cada ciudadano e ta!
