Segun presidente Edward Maduro:
ORANJESTAD (AAN) Den un entrevista cu DIARIO, e presidente di Sindicato di Aduana (SADA), señor Edward Maduro, a comenta cu 2001 ta e ultimo aña cu Gobierno a indexer a base di porcentahe. Despues, pa un periodo largo no a indexer y despues a bay over na indexer riba gelijkbedrage, kiermen un suma igual pa tur hende.
“Pero esey, atrobe, tin su consecuencianan pasobra. Si por ehemplo, ban bisa ta duna tur hende 300 florin di aumento (gelijkbedrage) kico ta sosode? E hendenan cu ta na un scale mas abao den porcentahe ta bay haya casi 16% di adelanto, pero e scale mas halto ta haya apenas 3% di adelanto”, Maduro a menciona.
Awo, por ehemplo den caso di SADA, su miembronan a indica kico ta nan deseo y otro sindicatonan tambe mester a bay bek na nan miembronan y SADA a haya feed back cu nan kier haya cu nan kier haya ahustacion den porcentahe.
“Den mi concepto como sindicato y cu tur sindicato a bin hunto, esaki no ta locual e miembronan kier. E miembronan kier ahustacion den porcentahe y no un vast bedrag”, Edward Maduro a señala.
El a indica cu esnan di salario mas abao a bay dilanti cu mas of menos 300 florin, aunke e no ta corda foi cabes, pero e ta punta con ta bay bin si duna un ahuste den salario for di gelijkbedrag y tin hende cu ta bay keha y otronan cu lo acepta. Pero e miembronan di SADA a trece nan deseo dilanti. SADA como bloke ta satisfecho di loke a wordo logra y awo tin cu bay wak den futuro con esaki lo desaroya.
