Miembronan di OPPA a celebra 'Dia Mundial di Adulto Mayor'

ORANJESTAD (AAN): Presidente di OPPA, Sr. Ivo Valdez a indica den cuadro di celebracion di Dia Mundial di Adulto Mayor, cu a cay e aña aki riba diadomingo,  1 di october 2023, nan a organisa un celebracion pa nos grandinan.

Valdez a splica cu semper cu nan ta organisa actividad, pero masha poco 80 plussers ta participa den e actividadnan, y pa motibo aki, directiva y comision di actividad a dicidi di haci e dia mas special pa e 80 plussers. El a agrega cu logicamente no ta tur ta participa, hopi di nan no ta cana bon mas, of ta den rolstoel of na cama. Nan a calcula cu alrededor di 50 persona 80 plussers lo ta presente y a prepara varios actividad, manera Tai chi, charla y entretenimento pa nan edad.    

Sigur un bunita iniciativa di OPPA pa percura pa e grupo di edad aki tambe pasa dushi y celebra nan dia.

Riba potretnan por wak caranan contento, mientras nan a pasa un rato ameno y a socialisa cu diferente persona. Tambe ta un dia pa trece mas concientisacion pa duna mas atencion, amor y cariño na tur nos grandinan, pa tur e trabounan y e lucha cu nan a hiba pa logra crea e comunidad cu nos tin awe.