Miembronan di Kiwanis Club of Aruba a ricibi presentacion di Radioterapia y Oncologia di ImSan

ORANJESTAD (AAN): Recientemente durante un di e reunionnan general di Kiwanis Club of Aruba,

nan a ricibi como invitado special, e profesional Junior Rivero di ImSan, kende a trece un topico hopi interesante dilanti.

   E profesional di ImSan a duna un presentacion cu datonan importante cu nan ta ricibiendo di ImSan su departamento di Radioterapia, Oncologia, y di Imagen.

   E sesion dilanti e miembronan di Kiwanis Club of Aruba, a ofrece un bista balioso y tambe informacion nobo, y tur esaki a wordo bon ricibi cerca tur hende cu tabata presente na e reunion general.

   El a mustra con imagennan di un ser humano, ta demostra claramente kico ta un Gross Tumor Volume (GTV) cu ta referi na tumor visibel of cu por wordo detecta, y ta un blanco primordial pa radioterapia (‘bestraling’).  El a mustra riba e mesun potret unda bo ta haya Clinical Target Volume (CTV), cu ta encera tur loke tin rond di e tumor di GTV, y cualkier malesa sub-clinico microscopico.  Esencialmente e ta representa e area unda radiacion mester wordo entrega pa por logra cura e tumor.

   Kiwanis Club of Aruba ta gradici Sr. Rivero, y tambe ImSan pa nan partnership continuo y dedicacion pa salud di comunidad.