ORANJESTAD (AAN): Miembronan di Aruba Timeshare Association a bini hunto pa un lunch-meeting na La Cabana Beach Resort & Casino
cu representantenan di mayoria di e isla su Vacation Ownership properties, nan controladonan financiero y algun di e partners strategico a atende.
E brigada di The Food & Beverage di La Cabana Beach Resort & Casino a host un lunch meeting excepcional cu bon cuminda y tremendo servicio.
ATSA su presidente, Luigi Heredia, Costa Linda Beach Resort, a duna bon bini na miembronan y guests net prome cu e opening oficial di e encuentro. El a pasa un rato door di e agenda di negoshi repasando preocupacionnan actual y retonan dentro di e industria manera e topico di reforma fiscal, Tourist Levy y aumento di Import Duties, como tambe varios otro temanan di labor, labor shortage y otro temanan afectando e industria.
Pa e meeting di Augustus Heredia tabata tin algo special den mente pa e forum. E tabata orguyoso di por introduci International Motivational Speaker Kaplan Mobray, Kaplan ta reconoci pa meetings & conventions Magazine como un di e topnan den business speakers.
Dos aña pasa, Mobray, un autor y consultante di carera tabata un tremendo motivational-speaker guest na ARDA conference, representando vacation ownership y industrianan di desaroyo di resort, na unda el a conoce Heredia, kende a disfruta di su presentacion asina hopi, el a invit’e pa bin haci un serie di charla na su resort, Costa Linda Beach Resort, y pa un invitacion special den e meeting di ATSA.
Mobray su mensahe na miembronan di ATSA tabata leuk y tambe informativo. Cu ayudo di un saxophone, un bala berde cu glitter, slides colorido, musica divertido, y conceptonan facil pa compronde, Mobray a papia tocante e rol di liderazgo den e creacion di excelencia. Excelencia ta diseña pa maximalisa satisfacion di labor pa empleadonan como tambe entrada pa negoshi na mes momento.
E topico di dia tabata con lidernan por set standards, specialmente den temponan cu hopi reto. Hunto cu su audiencia Mobray a purba na defini e cambionan cu nos a pasa aden y retonan cu nos a enfrenta durante pandemia, compartiendo su teorianan unico y strategianan practico pa yuda hisa e nivel den loke ta servicio, inspira empleadonan cu mas energia y vision anto aplica tools efectivo pa exito den hospitalidad.
Miembronan di ATSA a sali for di e encuentro aki cu un sonrisa riba nan cara y cabes na laira sabiendo cu nan tin e den nan, cu nan tin e poder pa haci mas y ricibi mas, determina pa hiba nan organisacionnan y nan mes na un nivel mas halto di exito.
Na Costa Linda Beach Resort, Mobray a traha cu gruponan mas chikito mustrando su personalidad dinamico y compartiendo su conocemento di bida. El a encurasha empleadonan pa mira nan mes como un parti integral di e negoshi cu ta yuda crea, cura , dirigi, salba y habri caminda, multi-tasking y mehorando nan marca personal y desaroyo di liderazgo.
