ORANJESTAD (AAN) -- Un reaccion interesante a drenta na mesa di redaccion di DIARIO, di un ciudadano cu ta fanatico di un serie Mericano,
dramatiza na Chicago, cu ta consisti di casonan cu ta presenta na departamento di polis, otronan na departamento di bombero y un na un hospital di Chicago.
E ciudadano a comenta cu den un capitulo di esun di hospital nan a presenta e caso di un pareha, unda e señora tabata interna pa duna luz cu un parto dificil, y su casa cu mester a bolbe di exterior unda el a biaha pa asunto di trabao.
Na dado momento un nurse a ripara cu e meneer no tabata mustra bon di salud, y a pidie pa acompañ'e pa haci un test di sanger, pasobra el a haya sospecho cu e persona a haya un virus.
Pero na e pais cu e meneer a bisa cu el a bay, no tin e sangura cu ta causa e virus pa cual el a sali positivo pe, cu ta Chikungunya. Y como cu e hospital ta registra tur caso di virus, cual cu sea, e meneer mester a bisa e berdad unda el a biaha. A resulta cu nan a uza e nomber di Aruba mal uza.
Den e storia e meneer a biaha pa Aruba cu un amante, y aki el a pega cu e virus. Loke mas a irita e televidente ta cu na final di e capitulo, e docter cu a atende cu e caso a drenta e oficina hunto cu su novia (nurse) y ora cu esaki a bise “cuidao ora bo bay cu vacacion” e docter a contesta: “NO! Mi no conoce Aruba, y sigur mi lo no bay eynan”, comosifuera cu ta na Aruba so tin sangura cu ta transmiti dengue, y comosifuera cu Aruba ta un pais pa turistanan bin cu un amante.
El a sintie den su curazon, pasobra e ta stima su Isla cu tin asina tanto cos bunita di ofrece, y hendenan asina amable y educa, cu por a propaganda otro cos ya cu ta un serie cu mayoria di hende na mundo ta sigui, na lugar di e storia ey di infidelidad y chikungunya.
