ORANJESTAD (AAN): Durante conferencia di prensa riba Diamars, Minister Glenbert Croes, mandatario encarga cu Labor, Energia y Integracion a indica cu el a yama un conferencia di prensa debi na loke 24.ora,
Enfoke di Patrick Paskel y Speed Andrade, cu aparentemente a señala cu tin un persona ilegal trahando den cas di Minister Glenbert Croes.
Minister Croes a bisa enfaticamente cu e noticia aki ta totalmente falso. "Minister Glenbert Croes no tin ningun ilegal trahando na su cas. Esun cu ta cuida mi cas ta mi señora. Un biaha pa siman, un señora ta yuda nos na cas. E señora aki ta casa cu un Arubiano y ta legalmente na Aruba".
Minister Croes ta kere cu nan ta demasiado custumbra cu casonan di tempo di Gobierno di AVP, cu a wordo implica den corupcion, cu hendenan ilegal den nan cas y como tambe traficacion di hende.
Segun e mandatario, e noticia ta masha indignante, no solamente pasobra e ta falso, pero den su opinion, Patrick Paskel y Speed Andrade y nan medionan di comunicacion ta hungando cu enfermedad y dolor di un persona cu nan a conoce for di tempo cu e ta traha pa su mama, un bon señora. Y ta usando su situacion, cu den momentonan aki mester di asistencia humano y medico, pa motibonan politico. Segun e mandatario, esaki ta e unico motibo cu nan ta usando e caso aki, y esaki ta completamente inaceptable.
Como Minister di Labor y Integracion, e mester para pa tur yiu di tera y como Minister di Integracion, pa tur imigrante, sea nan ta legal of ilegal, nan tin derechonan humano fundamental cu mester wordo respeta. Minister a bisa cu esaki ta apenas un caso cu nan a trece dilanti, pero el a indica cu tin hopi mas caso, cu prensa no ta na altura di dje.
Loke ta importante pa Minister Croes den e caso particular aki, ta duna e asistencia medico y humano cu e señora y su famia mester di dje. El a tuma contacto cu señora y ta buscando tur manera pa yude y su famia. Minister a splica cu ora ta trata di personanan cu a bira ilegal pa cierto circumstancianan. Mester por ta conciente cu cada caso tin un storia di bida, un storia humano y tur hende mester tin sensibilidad pa esaki.
Minister Croes a bisa cu hopi biaha ora ta papia di stranhero, esaki ta di un manera denigrante, cu resentimento, cu xenophobia, pero ningun hende mester lubida cu ora cada persona cu ta biba na Aruba subi un avion, bay unda cu ta, nos tambe ta bira stranhero.
E ta condena e hecho, tanto como persona y como Minister, cu ta malusa e caso aki pa razonnan politico. Pero esaki no a keda te eynan, tin un persecucion contra su señora y su yiunan. Nan ta wordo filma ora ta busca su yiunan na scol, como si fuera nan no tin derecho riba nan privacidad. Minister a bisa cu el a scoge pa ta den politica, no su famia. Hasta amigonan di scol di su yiunan no ta scapa y ta wordo filma! E ta haya esaki un violacion di privacidad, cu instigacion contra su persona. Y den su opinion esaki ta completamente condenable y inaceptable.
Minister ta puntra su mes, pakico e furia di Nelson Speed Andrade y Patrick Paskel contra su persona? Ta ki interes e ta bezig ta 'touch'? Obviamente esaki mester ta algo hopi grandi pa nan. E mandatario a bisa cu lo ta hopi facil pa baha Andrade, Paskel y nan medionan for di su lomba, pero esey lo nifica cu e mester baha cabes pa nan doño. Y Minister a bisa cu esey no lo pasa. "Nan doño no ta mi doño, sea nan financiado, of doño di AVP, pero el a bira politico pa sirbi interes di Aruba y no pa sirbi interes di doño di Patrick y Speed".
Minister a enfatiza cu e sa cu e ta combatiendo 'cartelnan' di corupcion, cu ta traficando hende, pisca, oro y droga, y el a priminti cu e lo caba cu nan y nan tentaculonan, nan contactnan, complicenan den cierto departamentonan. E ta kere ta importante pa trata asuntonan cu ta regarda situacionnan di necesidad, penoso y dificil cu dignidad humano, no solamente den caso aki, pero den otro casonan.
Minister a bisa cu e ta reconoce cu tin problema y tardanza, na unda mester tin eficiencia y efectividad den trata asuntonan, sea pa 'permisologia' si ta pasa via DPL of DIMAS, pero tambe na otro departamentonan, mester trata interes di nos comunidad cu seriedad y e deber di kier cumpli, duna cara y brinda servicio. "Nos mester habri nos portanan pa Pueblo y duna nan e asistencia cu nan merece", Minister a termina.
