Minister Dangui Oduber: *Ya caba ta gastonan ta riba 2 miyon florin
ORANJESTAD (AAN): Minister di Salud y Turismo, Dangui Oduber, a duna un actualisacion riba e pashentnan cu Covid-19 cu ta wordo admiti na Dr. Horario Oduber Hospital.
El a bisa cu mayoria di nan tin un condicion fisico, sea nan ta vacuna of no vacuna. 39.3% ta sufri di presion halto, 32.4% ta pashentnan diabetico, 10.3% tin problemanan cu riñon, 6.7% ta personanan cu problemanan cardiovascular y casi 3% ta sufri di cancer.
E datonan di Hospital for di Maart 2020 ta mustra cu 76.2% ta sobrepeso di cual 52% ta obeso.
E mandatario a indica cu pa e motibo aki tambe gobierno a anuncia e plan nacional di prevencion algun tempo atras cual ta den pleno ehecucion pa bin cu un centro di obesitas pa yuda e pashentnan aki cu tin mas necesidad di dje pa mehora nan calidad di bida.
Un bes mas ta wordo demostra cu esnan cu no ta saludabel, Covid-19 ta afecta nan severamente, a bisa.
Di e cantidad di pashentnan cu a wordo manda pa Colombia, desde comienso di luna di Juli, Aruba a manda un total di 43 pashent pa Colombia cu tabata tin mester di cuido. 36 di nan no tabata vacuna, 7 di nan tabata vacuna completamente, a señala.
Segun Oduber, ta importante tambe pa señala e costo cu esaki ta trece cu ne. Cada pashent cu wordo manda pa Colombia ta costa e Seguro Medico General (AZV), un averahe di 50 mil florin.
Ya caba ta riba 2 miyon florin pa loke ta e cantidad di pashentnan cu mester a wordo manda pa haya tratamento na Colombia, e mandatario a remarca.
