ORANJESTAD (AAN) – Parlamentario Alvin Molina, den conferencia di prensa di fraccion di MEP, cu a tuma lugar na Caya Principal na San Nicolas, a señala cu Gobierno ya caba a expresa su intencion pa traha pa desaroya San Nicolas:
“Pero nos nos ta bay hacie? Con nos ta bay logra esey, ken tin e experiencia y conocimento pa haci esaki, ken ta esnan specializa pa por haci esaki?” el a puntra.
Molina a expresa cu mester di hende profesional pa haci e trabao y ora ta toca un plan pa desaroya un comunidad lo mester di un “community designer”.
“Esaki por ta un hende of un compania cu por yuda nos pa logra e metanan cu nos kier mira den nos comunidad”, el a splica, agregado cu e no por ta cualkier persona, pero e mester ta un profesional acredita, cu experiencia y conocemento, cu berdaderamente por desaroya e comunidad di San Nicolas manera nan kier pa wordo haci y na un manera sostenible.
“Nos ta para akinan na main street na San Nicolas, di un banda nos kier barnan, animeer dames; di otro banda nos kier un centro economico unda e famianan ta bin haci nan compras. E dosnan ey por existi banda di otro? Wel, nos tur por wak cu e ta un desastre na e momentonan aki, e no ta apto pa ningun motibo cu nos tine, eigenlijk”, Molina a remarca.
El a lamenta cu San Nicolas tin edificionan na estado deplorable, y hopi di nan ta afgekeurd, y esnan cu no ta ainda meste wordo afgekeurd nan ta peligroso. Ademas el a menciona cu tin e “backstreetnan” masha scur mes, prostitucion ilegal, bendemento di droga, tin chens grandi cu hende por wordo atraca eynan tambe, y tur esaki tin efecto riba e centro comercial, pasobra ningun famia ta bay trece nan yiunan eynan pa shopping.
El a bisa cu kizas e dos lugarnan menciona por existi banda di otro, pero bon organiza of un di nan mester muda for di eynan. “Por ta nos mester busca otro caminda pa ubica nos centro comercial; mude bay Bernardstraat of Pastoor Hendrikstraat, pero kico esey lo nifica pa e bestemmings plan? Kico esey ta nifica pa e hendenan cu ta biba den bario? Kico esey ta nifica pa e accesibilidad? Kico mester wordo haci pa e infrastructura pa esaki wordo haci posible? Ami, no sa! Gobierno no sa! Y esey ta logico, pasobra ningun di nos a studia pa ta un arkitecto di un comunidad, y pa colmo, si nos lo tabata sa nos mester a haci esey hopi tempo pasa caba”, Alvin Molina a remarca. Pa finaliza el a expresa: “Pesey mi ta boga pa trece ‘the best’ pa San Nicolas, pasobra San Nicolas merece ‘the best”, concluyendo, e parlamentario a referi na e plannan cu tin pa fusiona ImSan cu HOH, locual e tambe ta considera inaceptable. E ta sinti orguyoso di e Instituto Medico San Nicolas y di e trabao di su director dr. Joel Rajnherc.
