Presidente di ATIA Herrick Henriquez:
ORANJESTAD (AAN)—Presidente di Aruba Trade and Industry Association (ATIA_, señor Herrick Henriquez, den entrevista cu DIARIO a expresa cu e presupuesto di gobierno na tempo, ta algo hopi positivo y no conservative, pero alaves hecho ta cu ATIA no ta wak transparencia.
El a bisa cu por wak e high light di e presupuesto pero no ta wak e argumentonan con nan ta yega na e presupuesto. “Ami mes ta un homber di cifra, mi ta gusta wak e cifranan y eynan tambe, mi ta kere ta un reto pa gobierno, ta mas transparente cu e cifranan publico, pa na final di dia ta cu placa di pueblo nan ta traha cune, y esey nos kier pa maneha miho posible”, Henriquez a señala.
El a agrega cu si gobierno tin cu genera mas placa pa inverti, e pregunta ta ki idea tin pa genera mas placa sin subi e peso pa e comerciante ni pa pueblo.
“Esey ta algo importante pa wak y cu nos a puntra nos mes di con ta tuma cierto decision cu falta transparencia y tambe e colaboracion cu comercio. Sinta cu nos, sinta cu expertonan pa haya ideanan con nos por yuda e pais aki bay dilanti. Eigenlijk, nos tur ta trahando pa e economia crece y asina e entrada di gobierno tambe crece”, Henriquez a reitera.
El a añadi cu el a reitera varios biaha: “Of bo ta tuma e parti mas grandi di e bolo of bo tin cu inverti y hinca mas ingrediente den e bolo pa e crece pa asina tin mas parti pa tur hende”.
Tocante e tema di BTW, presidente di ATIA a bisa cu pa nan, ainda nan ta papia cu esaki ta e belasting ideal pa Aruba, pero no na e manera con el a wordo presenta den pasado. E tabata contra dje. El a subraya cu na 2018 IMF a haci un estudio y a duna un recomendacion pa Aruba, cu e mester ta un BTW cu un base amplio, y cu menos excepcion posible.
“Nos ta wak cu e BBO mes tin masha hopi excepcion; e BBO na frontera a drenta y tin algun sector cu no a tene cuenta cune, manera e sector medico, sector farmaceutico, y construccion ta otro tambe. Nos ta na mesa si, papiando cu departamento di impuesto, cu minister di finanzas, pa wak con nos ta yega na un solucion pa esaki. Eigenlijk, sector medico ta pa nos tur y AZV ta carga mayoria di e peso eynan” el a señala agregando cu si finalmente e prijsnan ta subi ta pueblo ta wordo afecta.
Finalmente, presidente di ATIA a expresa su deseo pa Parlamento, pa e Aña Parlamentario nobo y esaki ta pa tin e forza y sabiduria pa tuma e decision corecto y no esun popular so. Esey si ta bay yuda e pais aki!
