Hose Figaroa, lider FTA ta splica:
*Derecho no ta proteha pa hopi trahado!
ORANJESTAD (AAN) – Na diferente momento FTA (Federacion di Trahadornan di Aruba), a acerca Departamento di Labor y e Minister tambe, tocante e tema di abusonan cu ta tumando lugar na pia di trabao, den varios empresa.
Hose Figaroa, presidente di FTA a señala, den entrevista cu DIARIO, cu e problema ta cu e mesun puntonan ta bin dilanti, sinembargo no ta mira cu nan ta haci algo specificamente pa ataca e problema.
Hopi biaha nan ta aborda e problema di otro manera, bisa cu mester drecha of cambia e Ley, etc.
“Pero bo por bin drecha, cambia, y bin cu cualkier ley cu bo kier, pero tanten cu bo no percura pa e ley ey wordo cumpli cune, anto tanto bal! Tur ora mi ta duna e mesun ehemplo: esaki ta mescos cu bisa cu aki na Aruba importa droga ta ilegal, pero no ta pone duana controla na aeropuerto. Y hende djis pasobra Ley ta bisa cu algo ta ilegal, esey no kiermen cu automaticamente tur hende ta bay cumpli. Tin hende ta bay purba tog, pasa bao di e reglanan cu nos tin, y como gobierno, of instancia gubernamental, bo tin cu pone hende pa controla cu enberdad ta wordo cumpli cu e reglanan”, Figaroa a señala.
E lider di FTA a expresa pa ban laga no enfoca riba cambionan di ley, sino enfoca un rato riba aplica e leynan, manera cu nan ta of zorg pa wordo cumpli cune, y haciendo esey automaticamente por wak tambe si tin partinan di e ley cu tin cu wordo modifica.
“Pasobra e unico manera cu por tuma e decision ey ta si bo wak con e ta den practica. Anto pa wak con nan ta den practica bo mester haci controlnan na pia di trabao. NO por otro!”.
Figaroa a reitera cu diariamente FTA ta hayando afiliacion individual y a subraya cu tin espacio ainda, pasobra tin hopi trahado na Aruba cu no ta sindicaliza.
“Pasobra nos tasanan di sindicalizacion no ta hopi halto y sigur den sector priva. Den sector gubernamental e ta un poco mas halto. Den sector priva tin hopi empresa cu no ta afilia sindicalmente, y esey ta haci cu e trahado no tin e proteccion cu e lo por tin, pero e ta keda un escogencia. Hasta e afiliacion individual e ta duna bo cierto proteccion, pero e no ta duna bo tur e beneficionan cu bo ta haya na momento cu bo ta un miembro afilia den grupo cu por ehemplo ta negocia un CAO”, Figaroa a remarca.
Un afiliacion Individual, Figaroa ta reitera, ta enfoca mas na proteha bo derechonan como trahado y zorg pa e dunador di trabao no haci cosnan cu ta contra ley, cu ta un di e problemanan cu FTA ta mira aworaki.
