ORANJESTAD (AAN) – Señora Bertha Wolf, hunto cu Alexis Tromp y Arthur Kelly, a yama un conferencia di prensa, den representacion di Fundacion Mi Cutisa,
na caminda pa e gran estreno di Documental e Dande di Aruba, cu lo tuma lugar dia 27 di December na e sala di “The Movies Principal” na San Nicolas.
Seguidamente, Alexis Tromp, trahador di Mi Cutisa, a indica cu na 2016 e Cineasta Documentarista Cindy Kerseborn tabata tin un presentacion na Biblioteca Nacional di Aruba, na unda el a presenta su documentalnan.
Na momento cu e tabata na Aruba e kier a haci un documental di Aruba, pero e no tabata sa riba cual tema, y e ora ey el a drenta den contacto cu Ruby Eckmeyer, cu na e momento ey tabata traha na Universidad di Aruba, haciendo investigacion hunto cu un grupo, y un di nan tabata investiga a base di Dande.
Asina Cindy a bin conoce cu e palabra Dande y di eynan su persona, Ruby Eckmeyer y Mi Cutisa a papia y a dicidi di realiza e documentario Dande di Aruba.
Tromp a indica cu na 2017 e prome fase a wordo filma, y el a bay sin ningun problema. Despues, na 2018 e di dos fase a wordo filma. Alex Tromp a splica cu pa traha e documentario aki, no tabata facil. Tabata tin hopi obstaculo tanto di tempo como di fondo. E personahenan den e documentario hopi di nan ta di edadnan halto cu nan no tabata sa si na cualkier momento di e filmacion, por a fayece. El a haci e observacion aki, pasobra ora di filma Dande, tur hende na Aruba sa cu e emocion ey por sintie solamente na cuminzamento di aña. Pesey mester a warda pa 2017 pasa completo pa filma e prome fase pa e di dos wordo filma na 2018. Pero vida tin su cosnan straño cu ningun hende por splica su mes, y lamentablemente na e directora Cindy Kerseborn a fayece, y esey tabata otro obstaculo pa Mi Cutisa. Pero prome cu e cineasta a fayece el a laga e film atras unda cu su colega Sherman di Jesus tabata tin un compania na Hulanda, y el a tuma e parti di e proyecto ey y te awe Mi Cutisa hunto cu Sherman, a logra finaliza e documentario aki.
Tromp a sigui splica cu e documentario aki ta hopi interesante pasobra a bin cierto confrontacionnan aden, boxmento di generacionnan, y tambe e parti di machismo a bin padilanti, y rebeldia di e sernan femenino y hasta ta bin discriminacion acerca, cu ta cosnan cu Alex Tromp mes no tabata sa cu a sosode na Aruba.
Arthur Kelly cu ta forma parti di e grupo di film, a sigui mencionando cu su rol den e film tabata haci entrevistanan. Na dos December sigui (2016-2017), el a wordo contacta pa Cindy hunto cu Mi Cutisa, pa wak si e kier a tuma e rol pa loke ta e parti di informacion.
Esaki a encera haci entrevista, saca informacion y nan a traha hopi duro te fin di aña durante dos December consecutivo pa documenta con Aruba ta celebra fin di aña. Den un siguiente articulo DIARIO lo elabora mas riba e conferencia di prensa aki.
