ORANJESTAD (AAN) – Durante su conferencia di prensa, señora Solangel Dinmohamed-Lacle, relaciona cu e no cumplimento di e protocol cu tur candidato riba lista di MAS a firma, a sigui splica cu nan a duna e protocol un poder irevocable na e bestuur di e partido.
“Es decir, bestuur di e partido tabata tin e tool den su man pa bay Conseho Electoral. Akinan ta caminda a bin un diferencia grandi entre husticia y ley. Aunke cu nos tur lo a desea pa ley ta husto, no ta tur biaha, esaki ta asina. Pero nos, como ciudadano, tin e deber y e responsabilidad moral pa ta husto. Y nos gobernantenan nos ta exigi nan pa ta personanan husto pa asina ey por adapta leynan cu ta anticua, y cu no ta bay di acuerdo cu nos democracia cu nos ta bisa di biba den dje”, Solangel a expresa.
El a sigui splica cu for di 6 di Mei te 25 di Juni, tur candidato, incluyendo e lider di Partido a uza e protocol aki, como un tool di campaña. El a transcribi loke e lider di MAS Marisol Lopez-Tromp, a skirbi:
“Den Partido MAS no tin pleito pa nomber riba lista. Tur candidato a firma un protocol den cual ta acorda cu e candidatonan cu mas voto ta esnan cu lo drenta Parlamento pa sirbi Pais Aruba”, Dinmohamed-Lacle a trece dilanti.
El a agrega cu tambe señora Gunn, den un entrevista cu un radioemisora, dia 5 di Juni, a uza e protocol bisando: “Partidonan tradicional ta uza e pantaya di kiesverordening pa no respeta protocol. Nos a firma un protocol y esnan cu saca mas voto ta esunnan cu ta digno representante den pueblo”.
“Mi kier pone enfasis cu tur locual cu mi ta bisando ta cu pruebanan. No mi palabranan so, ta palabranan di señora Gunn, ta palabranan di señora Lopez-Tromp, y awe nos ta wak cu nan no ta respetando esakinan”, Solangel a remarca, agregando cu nunca e por a pensa cu e lider di Partido y otro candidato no lo honra e protocol aki, y haciendo esaki nan a comete gañamento y a manipula pueblo, pa por a haya voto.
“Despues cu e resultado individual a sali, mi persona a purba haya contacto cu Lider di Partido MAS, 22 biaha; 22 biaha mi a haya señora Lopez-Tromp, sin ricibi ni un solo yamada bek. Despues di tres dia ta message señora Lopez-Tromp pidiendo e un reunion cu caracter urgente, pa e duna aclaracion cu locual ta pasando cu e protocol cu nos tur a firma, mi a haya un mensahe di señora Lopez-Tromp, cual ta bisa cu e ta hopi ocupa cu asuntonan politico, y cu tur cos lo cana a base di kiesverordening. Pues e protocol, aparentemente, no tabata existi mas. Tambe e ta bisa cu ta keda na cada candidato si nan ta honra e protocol of no” Solangel a señala.
“Momento cu señora Lopez-Tromp a bisa mi esey, mi a tuma contacto cu señora Aquanette Gunn, kende a bisa mi: ‘Ami lo sigui e kiesverordening, y mi lo haci locual cu lider di Partido bisa mi haci’. Esaki tabata un hemchi di awa frio pa mi. Pero el a duna mi indicacion kico mi por spera di señora Gunn den Parlamento. E motibo pakico mi persona no a drenta Parlamento di Aruba, despues di ta e di dos persona cu mas voto riba lista, ta simple! Mi a wordo uza, y mi a wordo gaña durante full un campaña politico. Mi a wordo uza door di señora Marisol Lopez-Tromp y mi a wordo gaña door di señora Gunn”, Solangel Dinmohamed-Lacle a relata.
