“Mi a sinti y siña hopi”. Esey tabata e opinion en general di e publico presente na e charla cu dr. Oswald Raymond Wever a hiba riba su buki recientemente publica
“E señora humilde mulando maishi riba un cudi a haci mi sinti nostalgia...”
Asina tabata e comentario di un observado fihando riba kaft di e buki “Cultural & Genetic heritage of Arubans' di e autor dr. Oswald Raymond Wever.
E observado ta continua. “Añas atras mi a yega di pasa un periodo cortico practicando medicina cerca un pueblo pober na un pais Latinoamericano. Hunto cu mi pashentnan mi a mula maishi riba piedra pa despues transforma esaki den nan cuminda criollo (masha dushi mes) cu tabata worde cushina riba candela di palo.
Den ambiente relaja riba diasabra mainta 22 di oktober ultimo na Cas di Cultura un publico modera (pero sinceramente interesa) a acudi.
E evenemento a keda honra cu presencia di nos minister-presidente mr. dr. Evelyn Wever-Croes y nos minister di Cultura mr. Xiomara Maduro. Autoridadnan manera director di Archivo Nacional Aruba drs. Raymond Hernandez, Biblioteca di Aruba den persona di Zetsia Ponson y entre otro Olinda Rasmijn representando Fundacion Herencia Historico di Aruba
E orador a cuminsa su presentacion enfatizando cu a keda cientificamente comproba cu e prome skeleto humano (un dama) a keda excava na e continente Africano. Segun teorianan, humanidad a sigui procrea fo’i e punto strategico aki.
Dr. Oswald Wever no obstante a constata (pa medio di ocho aña di investigacion cientifico di e structura genetico di e pueblo Arubiano) cu 54% di e poblacion na aña 2013 ainda tabata Amerindio.
Den su investigacion nobo dr. Oswald Wever a pone e cultura Arubiano drumi riba e cama di su descendencia genetico Amerindio. Enfocando riba documentacion cu ta hiba nos back pa aña 1840-1850. Un epoca den cual tabata existi un lazo fuerte entre e isla di Aruba y Paraguana (Venezuela).
E orador a pone enfasis riba e hecho cu mester tene cuenta cu den pasado e Amerindio tambe tabata victima di sclavitud.
E escritor a keda contento cu e tantisimo pregunta nan ad rem cu a worde lanza na su persona tanto pa medio di e publico como e dos ministernan.
Por a mira un publico disfrutando di un bunita mainta ricibiendo informacion valioso riba nos cultura cu influencia Amerindio. T'e hasta por a scucha e peticion “si docter por a ripiti o continua su presentacion”.
Finalmente algun bishitante por a uni nan mes den e pensamento cu ta na su lugar pa nos minister-presidente mr. dr. Evelyn Wever-Croes tuma e rienda pa empuha un Ley den cual lo keda impone cu na tur forma di enseñansa aki na Aruba - fo’i school basico t'e cu Colegio Arubano- den bukinan di enseñansa lo keda registra cu e pueblo original Arubiano tabata: “Amerindio Caquetio”.
Relato skirbi pa Ofelia Paris.
Potret saca pa: Recensista licenciada Glenda Gil.
