Mi a lanta cu amor pa bestia

Mi ta bira rabia ora mi lesa e postnan riba Facebook, esun nan di bestianan abandona.

Siman pasa atrobe un otro post over di 7 kitten cu a wordo laga atras den un caha di carton, y tambe di e cacho abandona na pompstation di Paradera cu mester di un cas..  Y cuanto post mas mi mester lesa cada rato di e fundacionnan cu ta roga pa haya foster homes pa bestia tra'i bestia. Cada pasa un dia ta algo otro!

Mi mes ta stima mi bestianan asina hopi (nos tin 5 pushi y 1 cacho), mi no ta compronde dicon otronan no sa di experiencia e amor cu bo por sinti pa un bestia di cas ... e ta algo hopi real!

            Mi a lanta cu amor pa bestia, semper nan tabata welcome na nos cas. Mi mama tabata y ainda ta un amante di bestia, y unda e ta, su cacho fiel Maya tambe tey. Mami ta papia cu Maya, discuti cune, razona cune, e ta sirbi Maya cuminda special prepara cu hopi amor, y anochi prome cu nan bai drumi, mi Mama ta prepara Maya su macuto pe cu hopi cuido y atencion. Desde mucha, na cas nos a sigui su ehempel y nos a a siña stima y cuida nos bestianan. Semper tabatin un lugar den nos hogar pa amor pa bestia, y nos no a tira nan pafor; al contrario semper nan tabata mag di ta den cas. Nos a ‘dress up’ e cacho cu pana, e pushi nan tabata  drumi den cuna di popchi, nos a hasta wak nos pushi TikiTiki duna lus. Maar ja, esey ta e cos: e amor cu nos a siña di sinti pa bestia a bini for di cas.

Mi mama tabatin un curason pa tur cos bibo y nos a biba y crece cu e sentimentonan aki.

            Nos wela tabata mescos. Su cacho miniatura tambe tabata permiti den cas, riba scochi, den Oma Tina su brasa, y anochi e tabata drumi den airco. Tawatin varios cachó, tur cu nomber straño si: Chipi, Pilin, Goliath, Djaka Preto, y Oma Tina tabata adora nan tur. Nan tabata su companeronan stima tanten cu e tabata na bida. E sentimentonan a pasa for di generacion pa generacion.

            Sinembargo, nos tabata un famia Rubiano no mucho comun. Nos bisiñanan tabatin un cacho brabo – nan tabata lage pafor dun cura - su unico proposito tabata pa blaf si a yega hende straño, y nan tabata dun'e carni curu cu sanger pa hacie agresivo, segun nan. Uy, mi tabata tin un tristeza pa nan cacho.

            Dus mi ta sinta pensa --- pakico tur dia nos ta bataya cu e asunto aki di bestia abandona? Parce cu e campañanan di Spay & Neuter ta hasi casi 0 impacto. Y mi ta pensa esaki ta pasobra amor pa bestia mester bini for di cas! Nos ta bezig ta purba conscientisa e generacion robes! E generacion cu ta wak Facebook y cu ta tuma cacho cu pushi sin cuida nan no por wordo alcansa mas, nan no por siña kico ta amor pa bestia mas. Nos mester eingelijk dirigi nos energia riba e muchanan, un generacion mas jong.

            For di un edad jong nos mester siña mucha stima bestia, cu bestia tambe tin sentimento, cu bestia por transforma un mal dia den un bon dia, cu bestia por compronde nos idioma, comberti nos den mihor ser humano, cu bestia por elimina nos soledad ora nos bira grandi i nos yiunan y nietonan abandona nos.

            P'esey: si bo mayor no a siña bo stima un bestia, bo por siña esaki door di educacion. E lo tarda mas cu un generacion, pero ban cuminsa awor. Cuminsa na skol, peuterschool, djey kleuterschool, djey basis, brugklas, etc, te cu universidad. Compasion humano pa bestia mester ta un enfoque repetidamente durante nos hubentud.

            Tin hopi manera pa encurasha esaki:  kleurplaatjes, dia di hiba-bo-bestia-scol, skirbi un poema pa bo cacho, celebra Dierendag a la grande, studia culturanan cu ta adora bestia y haya sa dicon, laga un trainer bin skol y demostra muchanan con inteligente cachonan ta, bishita e Dog Hotel. Y naturalmente, parti di e trayecto di educacion, tambe siña tocante sterilizacion y castracion, Spay & Neuter. Pero enfoca principalmente riba e amor y balor…  comprension pa dicon mester sterilisa y casta lo bini dimes.

Otro idea nan? Ban brainstorm hunto: habri bo Dog Friendly Restaurant, bo Crazy Cat Lady Café, emplea un Office Dog (mi conoce un doño di negoshi local cu tin su mesun cacho den oficina: Queenie ta super cordial cu tur esnan cu ta bin bishita y e staff di oficina nan tur ta adore).

            Dus... Nos por cuminsa educa e generacion adecua? Ban cuminsa awor pa asina e muchanan’ki por bira ser humanonan mas cariňoso, no solamente pa bestia pero pa tur ser cu ta biba! It will take time, but we can do it!

            Ultimo cos: e dicho di Gandhi, "E grandesa di un nacion y su progreso moral por wordu huzga na e manera cu nan ta trata nan bestianan". Nos mester tin berguensa di nos mes como Arubiano! Nos ta un ehempel mahos. Ban cambia esaki! 

-Skirbi pa di un 100% Arubiano