No por paga number di auto 2026 si tin debe riba añanan anterior
ORANJESTAD (AAN): Den un entrevista recien cu DIARIO, señora Meverly Romano di Dimp a duna aclariacion riba e reclamonan cu tin riba tardansa di compobante di number di auto pa aña 2026. Segun el a splica, tur persona cu ta paga online via banco, Dimp ta pidi pa haci un peticion pa nan ricibi e recibo di pago oficial, dus esun di Departamento di Impuesto mes.
Segun señora Romano, Dimp a introduci e sistema aki pa paga online pa un tempo caba y ta conta pa tanto comerciante como pa personanan priva. E motibo cu a introduci esaki ta pasobra den transcurso di añanan, a ripara cu e cantidad di numbernan cu tin ta hopi halto y dado momento hopi persona tabata acudi na Dimp pa haci nan pagonan di impuesto y tabata forma rijnan largo te den parkinglot y pa oranan largo ta keda para den solo.
E proceso di pago a keda mescos. Clientenan ta haci pago via banco, ta yena un formulario digital cu ta obtenibel riba website di Dimp, y e ta upload e comprobante di banco. Y despues di esaki, e departamento di administracion ta procesa e recibo di pago.
Señora Romano a duna di conoce cu tin hopi cliente cu tin debe atrasa di pago di number di auto pa mas di un aña. Den e caso aki, no por paga personal na Dimp si tin debe atrasa, kiermeen nan no ta wordo permiti pa paga aña 2026 tanten cu e debe atrasa no wordo paga completamente.
Hopi cliente e ora kier maluza e sistema. Nan ta paga via banco y ta yena den e descripcion cu nan ta paga, den e caso aki, aña 2026, mientras nan tin debe riba añanan anterior.
Pero, señora Romano a enfatisa, e sistema ta traha di tal manera, cu ora un persona realisa un pago, aunke e ta pone 2026, ora administracion ricibi e peticion di e recibo, e regla ta cu tur pago cu drenta, ta wordo aloca prome riba e debe atrasa.
Esaki, señora Romano a enfatisa, ta e motibo pa cua e ta tarda un rato pasobra e departamento mester wak prome kico ta e historia di pago di e cliente prome cu procesa e comprobante. Despues di esaki, e cliente ta ricibi su comprobante di pago via mail.
