Presidente di Parlamento di Corsou Fergino Brownbill:
- E desaroyo geopolitico entre Venezuela y Merca por trece oportunidadnan pa paisnan den Reino
ORANJESTAD (AAN): Parlamentonan di e paisnan den Reino desde awe a cuminsa cu e reunionnan di IPKO na unda lo hiba combersacionnan intensivo con ta bay atende cu temanan cu lo hala e paisnan den Reino mas cerca di otro, asina Presidente di Parlamento di Corsou Fergino Brownbill a expresa durante un entrevista despues di yegada di e delegacion di Corsou na Aruba.
El a elabora riba diferente punto di Agenda di IPKO 2026 entre otro e desaroyo geopolitico entre Venezuela y Merca y e oportunidadnan cu esaki por trece pa tanto e paisnan den Reino den Caribe como pa Hulanda tambe. El a remarca, mirando cua ta e direccion cu Venezuela ta bayendo, lo no mira fluho di personanan grandi mas cu ta bay sali di e pais, mas bien ta mirando cu kier yega na un Venezuela hopi mas prospero cu lo mester wak ki beneficio esaki lo tin pa nos islanan.
Segun el a menciona, Venezuela ta conoci pa su petroleo y e intencion di Corsou ta pa wak kico Corsou por ofrece y tambe drenta den e opotunidadnan cu Merca ta habriendo actualmente. Ya caba Corsou a habri oportunidad pa haci uzo di su tankinan pa almacenahe.
Riba e tema di enseñansa pa nos hobennan cu kier bay studia afo, tambe e presidente di Parlamento di Corsou a indica cu e desaroyo geopolitico den region por tin influencia tambe den esaki. Tanto e paisnan den Caribe como Hulanda ta enfrenta retonan cu studiantenan. Ta necesario pa tin colaboracion entre tur pais den Reino y IPKO ta e plataforma pa yuda den esaki.
“Esaki ta un tema pero tin hopi otro cu nos por colabora cu otro cua ta e intencion mara na e agenda di IPKO 2026 y Triepartiet”, Presidente di Parlamento di Corsou Fergino Brownbill a enfatisa.
