MetaFit Walk & Run a kibra record cu 1700 participante

Tabatin hopi apoyo band’i caminda

ORANJESTAD (AAN): Despues di dies biaha di organisa e evento, e aña aki MetaFit Walk & Run a kibra tur record, den cantidad di participante y apoyo canto di caminda. Cu nan ruta nobo, un publico grandi a lanta marduga pa cana y core cu tres diferente opcion di ruta basa riba distancia.

Gerencia contento

Eddie de Veer, Chief Executive Officer (CEO) di MetaCorp no por a sconde su alegria y satisfaccion pa e exito di e evento di diadomingo marduga. No solamente e tabatin palabra di elogio pa e ekipo organisado, sino tambe pa e cantidad record di participante. E gerente di e compania netamente Rubiano cu mas aña di existencia continuo a gradici tur e sostenedonan di e evento, cu a apoya tur e coredonan y e canadonan diadomingo mainta.

Record

Normalmente e cantidad di participante ta varia entre 1000 te cu 1200. E aña aki a opta pa haci mas cupo pa participacion te cu 1500. Pero e demanda a sigui halto cu a pone cu dado momento e organisadonan a haya nan ta habri 200 cupo adicional pa asina alcansa e cantidad record di 1700 participante. Eddie de Veer ta premira cu lo aumenta e cantidad di participante pa otro aña te cu 2500.

Luga nobo a resulta tremendo

E aña aki, despues di tres aña sin tabatin e evento, a opta pa mud’e pa prome biaha pa e edificio di Gloria. E participantenan a conta cu un parkeerplaats grandi y espacioso, un ruta suave y sin mucho trafico y cu biento fresco.

E muchanan a gosa masha

E participacion di e muchanan den e caminata a trece un dimension diferente. Nan a duna color na e evento. Aki aya tabatin yoramento pero nan a sigui pusha, sigui cana pa demostra nan mes.

E resultado final

Despues di un exitoso Walk & Run a cera conoci cu e ganadonan pa e 18 categorianan. Tabatin categoria pa mucha y adulto. Tur ta separa entre hende homber, hende muhe, mucha homber y mucha muhe.