MetaCorp ta gradici tur esnan cu a asisti den e candela

Trahadonan a responde den gran forma

ORANJESTAD (AAN): Pa un rato, futuro di APEX tabata seriamente den wega y a mira hopi trahado ta seca lagrima fo’i nan cara. Di un banda nan tabata tristo pasobra ta mira con un candela cu no a cuminsa riba nan tereno, ta menasa di crusa y pega nan negoshi na candela.

            Pero, e DNA den cada un di nan ta yena nan cu un forsa increibel pa seca lagrima, lora manga di camisa y bringa e candela aki te final. A bira evidente cu no ta e ekipo material ta loke ta haci MetaCorp grandi, sino e recurso humano, e “asset” mas grandi di e grupo di negoshi aki.

            E trahadonan a contagia tur na e sitio cu nan dinamismo, nan compromiso sin igual, cu a traduci den un forsa y energia pa surpasa tur reto.

            E compania estableci na aña 1920 ta e compania netamente Arubiano cu mas aña di existencia continuo. Cu 102 aña di desaroyo, MetaCorp di famia de Veer a pasa di un generacion pa otro, pero semper a keda wanta duro na e cultura di su fundadonan. Traha duro y t’ey semper pa e pais cu a haci nan grandi. Y e cultura aki ta locual ta core den ader di cada un di e mas di mil trahadonan cu tur dia ta yega trabou contento pa sirbi, pa hiba nan mes, e negoshi y nan pais padilanti.

            Y locual sin duda a resalta durante e momento di emergencia y calamidad na Barcadera, ta e compromiso laboral cu ta core den ader di tur trahado, incluyendo gerencia. “Nos ta lead by example”, asina Eduardo de Veer, presidente di e Hunta di Comisarionan di MetaCorp, a vocifera.

            E mes no ta na Aruba pero a conta cu su ruman Gerardo, su yiu Eddie, sobrinonan y tur otro cu a traha sam sam cu tur trahado di APEX, ATCO Aruba, EcoTech y tur otro trahado di e famia di MetaCorp.       Nan hunto a haci tur lo posibel pa logra yuda bomberonan pa domina e candela y mas bien conten’e pafo di cura di APEX. E no tabata un reto facil y algun biaha a hasta pensa cu a perde e bataya, pero perseverancia y un energia sin igual a domina y a percura pa un final mas alentado di locual e tabata parce na un principio.

            “Danki. Nos ta hopi contento y orguyoso di tur nos trahadonan. Mi sa bon cu si no tabata pa e esfuerso di nos hendenan, awe e resultado lo tabata diferente”, asina Eduardo de Veer a expresa cu un bos di satisfaccion, aunke ainda preocupa pa e situacion.

            Den historia di MetaCorp, na mas di un ocacion a yega di confronta e tipo di retonan asina. E tempo aya, e salanan di cine tabata uza un tecnologia cu tabata kima facil.

            Varios di e edificionan di cine a yega di pega na candela. Pero mesun cos cu antes, ta e mesun trahadonan tabata lora manga y paga candela. Y den e casonan cu no a logra, a presenta mañan mes na trabou pa reconstrui y sigui padilanti.

            E  biaha aki, danki Dios, no a yega na un desaster pasobra a logra contene e candela net na tempo.