Santa Rosa ta mira bek riba 50 aña
ORANJESTAD (AAN): Luna pasa, den cuadro di Luna di Alimentacion y e celebracion di 50 aña di Departamento di Agricultura, Cria y Pesca Santa Rosa, su directora, Nathalie Maduro, a comparti informacion tocante e desaroyo di e departamento, e retonan cu e sector primario ta enfrenta y e vision pa fortalece produccion local na Aruba.
Maduro a recorda e historia di Santa Rosa, cu originalmente tabata opera den un area cerca di aeropuerto. Mas despues, durante e periodo di diputado Daniel Leo, e departamento a muda pa e lugar caminda e ta situa actualmente.
E aña aki, e celebracion tradicional di luna di October a combina diferente actividad den un evento special. Banda di un dia habri pa publico, cu oportunidad pa conoce e trabao di e departamento, e programa tabata inclui presentacion musical pa conmemora e medio siglo di existencia di Santa Rosa como departamento gubernamental.
Conscientisacion y diversificacion di produccion: Segun Maduro, cada bes mas hende ta reconoce e importancia di produccion local, especialmente den un contexto internacional caminda e prijs di cuminda y petroleo ta sufri fluctuacion. Aruba ta depende ampliamente di importacion pa abastece su mercado di alimento, loke ta haci e isla vulnerabel ora tin crisis internacional of interupcion den suministro.
Pa e motibo aki, Santa Rosa ta sigui anima comunidad pa explora posibilidadnan di planta den nan propio cura, cria bestia of dedica nan na pisca. E directora a enfatisa cu produccion local no ta limita na cultivo tradicional, pasobra actualmente tin productornan cu ta dedica nan na cultivo di mushroom y produccion di miel, entre otro iniciativa.
Maduro a señala tambe cu ta importante pa siña conserva cosecha. Ora un productor tin un cantidad grandi di alimento, e por congela parti di e producto pa mantene e disponibilidad y consumi esaki durante otro momento di aña.
Inovacion, facilidad y capacitacion: E tereno di Santa Rosa ta cubri aproximadamente 80.000 metro cuadra y tin diferente facilidad, entre otro stalnan, magazina, espacio pa equipo pisa, area pa bestia, y terreno pa cultivo di fruta y otro producto agricola.
Aunke e departamento ta participa den algun actividad di produccion, su funcion principal no ta pa competi cu cunukeronan local. Mas bien, Santa Rosa ta enfoca riba investigacion, prueba di tecnologia nobo y divulgacion di conocemento pa yuda productor mehora nan metodo di trabao.
Un ehempel di esaki ta hidroponics, un sistema di cultivo cu por resulta util pa hende cu tin poco espacio disponible y kier produci alimento di un manera eficiente. Mediante workshop y sesion di capacitacion, e departamento ta comparti conocemento practico cu personanan interesa den agricultura y otro actividadnan di e sector primario.
E reto pa haya awa: Disponibilidad di awa ta un di e retonan principal pa cunukeronan y criadornan na Aruba. Periodonan largo di secura y cambionan den condicionnan climatologico por limita produccion y aumenta e gastonan pa mantene cultivo y bestia.
Pa duna sosten na e sector, Santa Rosa ta coopera cu WEB Aruba N.V. pa facilita acceso na awa na un tarifa special pa cierto grupo di usuario.
Cunukeronan registra na Camara di Comercio como productor agricola y registra cerca di Santa Rosa por cumpra awa na un tarifa subsidia di Afl. 5,50 pa meter cubico, segun e informacion comparti pa e departamento.
Ademas, hende pensionado di 65 aña of mas cu kier dedica nan na cultivo tambe por solicita acceso na e tarifa special mediante Santa Rosa, sin e requisito di registra nan mes na Camara di Comercio. E medida ta ofrece un posibilidad adicional pa e grupo aki mantene nan cultivo y sigui produci.
Un Aruba mas autosuficiente: Pa Santa Rosa, e meta ta mas cu solamente aumenta cantidad di producto agricola. E departamento kier contribui na un comunidad cu tin mas conocemento, mas iniciativa y mas capacidad pa produci parti di e alimento cu e ta consumi diariamente.
Cu 50 aña di experiencia, e departamento ta sigui enfoca riba investigacion, innovacion y capacitacion, mientras ta anima mas hende pa mira agricultura, cria di bestia y pisca como actividadnan cu por contribui na economia y siguridad alimentario di Aruba.
E celebracion di e aniversario ta brinda un oportunidad pa reconoce e trabao realisa durante e ultimo cinco decada y, na mes momento, renoba e yamada pa fortalece produccion local y reduci dependencia di alimento importa.
