Meta di registro companianan construccion ta pa pagonan ta husto

Presidente di ATIA:

• Asina RCC lo percura pa tur belasting wordo paga na ora
• ATIA ta orguyoso cu RCC a bira legitimo awor 

ORANJESTAD (AAN): Registracion Companianan di Construccion (RCC) ta existi 3 aña y Aruba Trade & Industry Association (ATIA) ta parti di esaki for di un comienzo, dunando guia na e proyecto.

“Oficialmente ATIA ta forma parti di e hunta di comisario y nos ta hopi orguyoso cu e fundacion aki por a crece asina leu cu nos ta un organizacion legitimo awo, certificando companianan di construccion pa ‘level e playing field’ na Aruba, segun presidente di ATIA Herrick Henriquez.

El a sigui bisa cu tur cos ta pa e cliente ta sigur di un bon producto di construccion.

Segun Henriquez metanan esencial di RCC ta inclui pa tur trahador wordo paga na un manera husto y pa tur belasting wordo paga na ora.

“Awor mes nos ta bezig cu e comision aki y otro gremionan di construccion, papiando cu Departamento di Impuesto riba e BBO na frontera, mirando cu e companianan di construccion ta wordo exclui for di dje.

Tur hende mester corda cu construccion ta un tipo di indicador di e estado di bo economia, unda cu si bo wak construccion aumenta e ta un indicacion cu economia ta crece, segun e presidente di ATIA.

El a sigui bisa cu RCC ta mustra riba e hecho cu e sector aki tin mester di un estimulo pa por sigui crece den economia.

“Un certificado  asina aki ta yuda bo companianan y nos ta wak awor caba cu minister di Economia ta aproba e fundacion aki”, segun Henriquez.