Meta di “Justitieel Vierpartijen Overleg” ta pa comparti informacion y experticio pa combati criminalidad

Minister Rocco Tjon: --- ORANJESTAD (AAN): Recientemente, a tuma luga e reunion bi-anual entre Ministerionan di Husticia di e cuater paisnan cu ta forma parti di e “Justitieel Vierpartijen Overleg” (JVO).

E meta di e reunionnan aki ta pa traha hunto, pa asina comparti informacion y experticio pa combati criminalidad. E cuater paisnan presente na e reunion virtual aki tabata Minister di Husticia y Siguridad di Hulanda; Sra. Dilan Yeşilgöz-Zegerius, Minister President como tambe Minister di Husticia di Curaçao; Sr. Gilmar Pisas, Minister di Husticia di Sint Maarten Sra. Anna Richardson, y Minister di Husticia y Asuntonan Social di Aruba; Sr. Rocco Tjon.

Durante e reunion aki, Minister Tjon a enfatisa riba e importancia di traha hunto, pa asina combati criminalidad organisa. A base di esaki, a logra haci palabracionnan concreto pa duna mas contenido na acuerdonan cu lo mester wordo realisa cu e paisnan caminda criminalnan ta busca pa sconde. E paisnan lo traha hunto riba acuerdonan di extradicion y na mes momento lo brinda ayudo den e parti administrativo huridico. Ademas di esaki, a logra haci palabracionnan riba e colaboracion entre e paisnan, pa loke ta trata e departamentonan di “Kustwacht”, pa asina duna e permiso necesario pa por opera den awanan teritorial di cada pais. Esakinan ta di suma importancia, sigur pa e parti di traficacion di droga y hende.

Otro temanan cu a bin padilanti, ta e parti di prevencion di criminalidad entre hobennan. Pa trata e tema aki, ta pone atencion riba e persona cu ta comete e acto criminal, pero tambe riba e victima. Casonan asina, por wordo trata pa medio di intervencionnan preventivo di conducta, manera e programa; “Alleen jij bepaalt wie je bent” y e programa “Leerorkest”. Pues, durante e reunion a dialoga riba e iniciativa nobonan aki como tambe e resultado di e programanan aki.

Pa loke ta trata nos instituto coreccional, a logra haci palabracionnan cu e directiva di KIA, caminda lo bay haci intercambionan di personal cu otro institutonan coreccional di e paisnan cu ta forma parti di e JVO. Di e manera aki, ta percura pa intercambia informacion y experticio cu otro. Banda di esaki, a palabra tambe pa traha mas di cerca cu otro den cuadro di e desaroyo di cuido forensico pa hoben y adultonan, den e parti Caribense di Reino Hulandes, di cual Hulanda a indica di kier aporta na dje. Minister Tjon a pone enfasis riba e importancia pa traha riba solucionnan pa personanan cu ta den necesidad di “TBS- of PIJ-behandeling”.

Segun e Mandatario, intercambionan di informacion di investigacion di criminalidad transnacional, ta di balor agrega, mirando cu e ta duna un miho bista riba e relacion entre Hulanda y demas paisnan den Caribe, pa loke ta trata criminalidad. Hulanda a aloca 2.5 miyon euro pa por facilita y mehora e intercambio di informacion entre e paisnan di JVO. E fondonan aki ta pa fortifica e diferente puntonan caminda ta ricibi e informacion, pa ICT como tambe pa brinda cursonan na personal pa cu e sistemanan di informacion.

Adicionalmente, a haci palabracionnan entre e Ministernan di Husticia pa cuminsa cu un programa piloto, pa loke ta biahamento entre e paisnan Caribense den Reino Hulandes, usando solamente e “identiteitsbewijs”. Mester bisa cu esaki lo ta posibel, solamente pa esnan cu tin nacionalidad Hulandes y cu ta residencia den un di paisnan Caribense den Reino Hulandes.

Por ultimo, a dialoga riba e colaboracion intensivo entre e cinco Cuerpo Policialnan den Reino. Puntonan clave cu a wordo treci padilanti ta encera: integridad, coordinacion di informacion, maneho y “opleiding”. Ademas di esaki, a trata tambe e parti di opleiding pa e dirigentenan dentro di e diferente Cuerpo Policial. Un reunion sumamente positivo, segun e Mandatario, caminda a logra concretisa varios puntonan importante cu lo percura pa trece cambionan berdadero. E siguiente reunion lo tuma luga na Boneiro, bou di liderazgo di e Ministerio Hulandes.