Comerciante Frank Thielman:
ORANJESTAD (AAN) E Comerciante Frank Thielman, kende tin su negoshi den Caya Grandi, den entrevista cu DIARIO a cuestiona cu mientras cu polis tin man mara pasobra no tin ley pa actua contra e adictonan ambulante y kita nan for di caminda publico, e ta kere cu mester tin un maneho di parte di e Ministerio cu ta atende cu e problema di adiccion.
“Si no tin un maneho mi por compronde cu Polis no sa kico nan por haci. E maneho mester wordo structura, y mester bin cu hopi mas entidad cu ta traha cu otro. Tin Sociale Zaken, tin Husticia, Centronan di Adiccion. Tin hende cu problema sikiatrico, pues e ta multiple aspecto”, segun señor Thielman.
El a agrega cu mester wak tambe via Ley di Curatela, kico por wordo haci, pasobra no por detene hende contra su boluntad. Y nan ta wordo mira como adicto, comosifuera nan no ta responsabel di nan actonan, pero nan mester wordo mira y trata como delincuente, pasobra delincuente nan ta.
