Parlamentario Alvin Molina di MEP: -- *Na luga di ta un lugar cu ta costa pueblo placa!
ORANJESTAD (AAN) – Den conferencia di prensa di fraccion di Partido Electoral di Pueblo (MEP), parlamentario Alvin Molina a hiba palabra.
Parlamentario Molina a cuminza bisando cu aki na Aruba, tur hende mester cumpli cu e reglanan di trafico, y e momento cu no cumpli cu nan, e chens tey cu autoridad por tuma un vehiculo den bewaring.
“Nos mester zorg pa e auto ta den bon estado cu e no ta causa peligro riba caminda; e mester ta asegura por si acaso un accidente pasa cu e por cubri e gastonan, vooral ora nan tin di haber cu cubrimento di bo salud. Anto, como automobilista tambe nos tin e deber di aporta na mantencion di e camindanan na Aruba, mas miho posible”, Alvin Molina a splica.
El a agrega cu otro manera cu polis por tuma un auto den beslag ta ora tin un acto penal, cu mester tuma e auto pa investigacion.
“E meta tras di un accion di polis semper ta pa zorg pa e acto cu no ta cumpli cu ley, para. Djey polis tambe ta duna un boet cu ta eigenlijk un mensahe pa e persona no haci esaki mas y ora e auto ta wordo tuma den bewaring e proceso mester cuminza cana unda cu e auto ta wordo duna bek na e cliente, mas lihe posible. Si nos mira nos tras, nos por wak cu esey no ta e caso. Tur e autonan aki mester bay otro destino of bay bek na nan doñonan, pa asina e bida di trafico por bay afluente, pero si nos wak patras nos por mira cu esaki no ta e caso y cu hasta pafo tin hopi auto para, anto esaki ta un caso hopi investigable”, Parlamentario Molina a indica.
Molina a señala cu un di e causanan di esaki ta cu tin un falta di maneho; por ehemplo no ta duidelijk, na ki momento ni bao cual circumstancianan, autonan mester wordo tuma den custodia of den beslag. E parlamentario a subraya cu esaki no ta duidelijk ni pa e cliente ni pa autoridadnan. “Hopi biaha autonan ta wordo tuma den bewaring sin cu ta necesario, y di otro banda por mira cu autonan cu ta suppose di wordo tuma den bewaring, simplemente no tin lugar na Balashi ni otro wardanan di polis y consecuentemente e autonan of ta keda riba caya of nan ta sigui comete actonan contra ley, of e auto cu ta keda riba caya ta wordo destrui”, Parlamentario Alvin Molina a señala.
Problemanan cu ta topa cune den warda na Balashi, ta cu e tereno ta hopi insigur. E lugar ta parce un shopping mall cu ta habri ora solo baha. “Si gobierno ta tuma autonan den bewaring of beslag, ta gobierno ta responsable pa cuida e pertenencianan di hende. E intencion ta semper, cu ora e hendenan ta haya nan vehiculo bek, e por yega bek na un bon estado sin cu e ta wordo geplunder”, Parlamentario Molina a subraya.
El a agrega cu esaki ta costa gobierno hopi placa di belasting y ta costa pueblo placa di belasting na daño y perhuicio. El a indica cu mester percura pa haci e warda di polis na Balashi un lugar cu ta genera placa pa caha di Gobierno envez di ta un lugar cu ta costa pueblo placa.
