Miangela Ras, director CEDEHM:
ORANJESTAD (AAN) Directora di CEDEHM, Miangela Ras, den entrevista cu DIARIO a indica cu e instancia aki no por traha su so, pa loke ta regarda e situacion di maltrato domestico na Aruba.
Esaki ta un problematica extenso, compleho, cu eigenlijk ta afecta e comunidad completo. Nan ta traha hunto cu diferente instancia, entre otro HIAS. Recientemente, nan tabata tin un tremendo tayer di trabao, Ras a bisa.
“Berdad mester mas concientizacion pero tambe nos mester para keto na e factornan cu ta contribui na esaki. Kico eigenlijk ta e raiz di e causa di violencia domestico. Eynan hopi hende no ta para keto cu violencia no ta sosode di un dia pa otro, pero e ta bin di un rij di factornan cu ta contribui na dje, y esun principal ta desigualdad di genero”, Miangela Ras a señala.
El a agrega cu e rolnan cu hende homber y hende muher tin y kico e expectativanan ta di cada rol. “Pues, eynan e ta cuminza! Nos ta deduci di estudionan cu a wordo haci internacionalmente, cu tin dos factor cu ta contribui enormemente na stress den famia, y esey ta conduci na droga y alcohol, y tambe na problema di finanzas”, Miangela a indica.
