Mester implementa un maneho pa reduci e molester visual di adictonan den centro di ciudad

Marcelino Mauricio, Zorgmanager di Fundacion HUNTO

ORANJESTAD (AAN): Recientemente Stichting HUNTO a haci un recorido cu Minister di Salubridad Mervin Wyatt-Ras na varios ‘hotspot’ pa e haya un bista realistico di e diferente gruponan di adictonan ambulante. Entre otro a bishita pafo di centro di ciudad como den e centro di ciudad mes.

  Señor Marcelino Mauricio, Zorgmanager di Fundacion HUNTO, a splica e diferente categoria di adictonan cu mester wordo trata tambe na diferente manera. Un categoria tin bon contacto cu e Bemoeizorg di Stichting HUNTO. Un otro categoria ta mas hostil, cu ta e grupo di enfoke, un grupo chikito cu por ta mas cu 20 persona.

  Señor Mauricio a duna di conoce cu e grupo aki ta e grupo di adictonan cronico cu droga a tuma control completamente riba nan pensamento y boluntad. Solamente nan por pensa riba uzo di droga y busca manera pa haya placa pa paga nan uzo di droga. Esaki ta e categoria cu mester wordo interna obligatoriamente y poni bou di curatela. Nan a perde contacto cu henter nan bienestar social.

   Mas pio ainda, señor Mauricio a señala, e grupo aki ta e grupo cu ta haci mas impacto pasobra esaki ta e grupo cu ta haci molester. E meta principal di Bemoeizorg ta pa haci contacto cu e grupo aki uzando medionan pa haya contacto cu e adictonan aki, entre otro door di duna nan pan, sapato, paña etc. Segun Mauricio, esaki ta un proceso largo pasobra adictonan no ta confia niun hende. Una bes cu haya contact cu e grupo aki, mester haci lo posibel pa no laga nan bay. Mester sigui bay cerca nan pa motiva y inspira nan pa logra trece cambio den nan bida.

   Señor Mauricio a agrega cu lo por stop e grupo aki di uza droga pero cu mester implementa un maneho pa reduci e molester visual den centro di ciudad door di percura cu e adictonan bay inloop pa baña, bisti paña limpi, come y pasa dia. Señor Mauricio a remarca cu esaki ta e manera con Bonaire a alivia reduci e molester visual cu exito den un aña. “Mi ta kere cu ta esaki nos mester haci tambe na Aruba. Momento cu bo mira un adicto limpi bisti, bo no ta ripara cu e ta adicto, solamente na su comportacion”, señor Mauricio a expresa.

  Un otro punto importante, segun señor Mauricio, ta cu nos mester yuda mehora e calidad di bida di e ciudadanonan aki, nan tambe ta ser humano. Adictonan mester haya un chens pa scoge cuido y no solamente sufri represion constantemente di polis. Si nan ta haya solamente represion, nan ta huy y e problema ta move pa otro luga.

   Señor Mauricio a enfatisa cu adiccion no ta solamente un cuestion di salubridad; mester trata esaki den un manera integral y humano, y conhuntamente mester traha un plan y atende cu adiccion holisticamente.