Abogado Desiree Croes: "Mustra cu bo por traha y cu bo kier"
ORANJESTAD (AAN): Tin personanan cu a imigra pa Aruba cu na e momentonan aki, pa un motibo of otro, ta biba akinan pero nan no tin documentonan di residencia.
Mayoria di e personanan aki, ta cana riba caya cu miedo di wordo para door di Guarda Nos Costa y wordo deporta. Pero kico ley ta bisa relaciona cu e situacion actual di e imigrantenan.
Riba esaki, abogado Desiree Croes a bisa DIARIO den un entrevista cu aworaki ley ta bisa simpelmente cu si un persona no tin su documentonan na ordo e tin cu wordo deporta y si e ta wordo gara.
"Esey no ta humano, sigur ora bo mira e situacion cu nan a pasa den e ultimo añanan y kico nos a caba di pasa cu e personanan aki no por a bay bek nan pais. Kico bo ta forsando por ta e grupo di personanan aki pa haci? Paga hende pa firma pa nan? Casa cu hende den un matrimonio ficticio. Esey ta e situacionnan cu nos no kier", a expresa.
E abogado a sigui bisa cu e ta kere cu si e personanan indocumenta cu kier legalisa nan estadia na Aruba y cu por haya un hende cu ta firma pa nan, cu nan por traha cualkier tipo di trabao, esey lo ta un bon opcion.
El a enfatisa cu el a compronde cu esaki ta e intencion di gobierno, di duna un trato special na e grupo di venezolanonan cu a keda atras. "Mi ta kere cu si esaki ta asina, mester probecha di e situacion ey cu bo ta busca un persona pa firma pa bo, cu por ta garante pa bo y traha. Mustra cu bo por y cu bo kier, anto mi ta sigur cu Aruba lo brasa bo tambe", Croes a declara.
No ta un situacion facil aworaki pa e grupo aki, pesey e ta contento cu 'La Casa del Venezolano' tey pa duna guia y yuda, pero mas cu tur cos e cambionan mester ta den gobierno, e abogado a finalisa bisando.
Desiree Croes ta abogado cu specialidad den casonan familiar, pero banda di esaki e tambe ta atende hopi caso riba tereno di migracion y permiso.
