Segun consumidor:
- Tin supermercado unda e prijs a bira mas cu 20 florin
ORANJESTAD (AAN); Un consumidor a tuma contacto cu mesa di redaccion di DIARIO, pa haci un remarke tocante prijs pa un dozijn di webo importa.
E consumidor a comenta cu den algun supermercado (poco) nan ta ofrece webo criyo, pero nan ta caba den un frega di wowo, no solamente pasobra nan ta menos caro pero pasobra e calidad ta miho cu esnan importa.
E ta haya cu ta produci webo crioyo mester conta cu mas sosten economico di gobierno pa nan por aumenta nan produccion, pasobra e webonan importa ya a yega 20 florin e caha di diesdos unidad, y e mes por a ripara den un supermercado cu tin consumidornan cu ora di wak e prijs nan ta laga para e caha y ta bisa cu nan ta prefera di no come webo, siendo cu esaki ta un di e alimentonan basico den e dieta di nos poblacion.
El a comenta tambe cu e sa cumpra bolo cerca un famia cu pa añanan largo ta traha bolo di e calidad di mas halto y sabroso, y cu pa fiestanan nan ta traha berdadero obra di arte. El a yama pa bestel un bolo pa su yiu cu ta bay cumpli aña y alavez caba su MAVO, y pa su sorpresa nan a stop di traha bolo, pasobra e materia prima a bira hopi caro y vooral webo. Ultimamente, nan ganashi tabata minimo, pero despues a cuminza registra perdida. Algo hopi lamentabel, e consumidor a comenta.
E ta spera cu comunidad mes cuminza apoya mas e farmers cu tin un industria chikito di webo crioyo, y cu gobierno por yuda nan cu subsidio, pa nan expande nan negoshi y kizas, hasta Aruba por exporta webo crioyo alomenos den nos regionnan bisiña.
