Bon gobernacion ta cuminza cerca e ciudadano cu ta dicidi pa e pais
*E voz di Parlamento, Raad van Advies y Algemene Rekenkamer
*Logro di Status Aparte tabata basa riba conocemento di Leynan
ORANJESTAD (AAN) — E forma cu hende demasiado bez ta mira Gobierno na un pais cu ta yama su mes democratico, ta deshaci di e esencia mas importante di democracia, cu ta e poder di Pueblo pa controla y realmente dicidi pa su pais.
Den construccion di gobernacion democratico, instancianan importante mester evita cu gobernacion di un pais ta bira un dictadura scondi den cual e maneho di propiedad y bienestar di Pueblo ta perde su balor.
Aruba ta un Estado di Derecho, un Estado di Ley. Esaki ta nifica cu tur cos ta wordo regla pa medio di Ley y no pa boluntad di ningun poder sea eligi of no eligi dor di Pueblo.
Con importante e observacion di bienestar di Pueblo ta den gobernacion di Aruba, ta cuminsa den top di Aruba como pais den Reino.
E Hefe di Estado di Aruba ta Rey y e Primera Dama di Aruba ta Reina, esposa di Rey.
Sinembargo, Rey no tin un poder absoluto na Aruba, cu conoce un monarquia Constitucional, cu directamente ta hiba na constitucion, cu ta regla e gobernacion di e pais.
Aruba ta un pais soberano den Reino a base di Statuut, cu ta wordo reconoci como uno di e mihor areglonan di gobernacion na mundo y cu ta duna Aruba, mescos cu tur otro pais di Reino incluso Hulanda, un gobernacion propio regla atrobe den Statuut.
E proteccion di e ciudadano di Aruba y su derechonan, ta bini hustamente dilanti den e separacion di podernan y realidadnan hancra den e base legal di Aruba.
E nacionalidad di e Arubiano y e hecho cu Aruba ta un teritorio di Reino Hulandes, ta parti integral di e areglo estatal total di Reino Hulandes.
Statuut ta regla e relacionnan den Reino, cu tin su constitucion y Conseho di Ministro di Reino.
E relacionnan den Reino ta basa riba e factor di democracia, cu ta hancra den e hecho cu cada pais ta scoge su Gobierno encarga cu su asuntonan pero semper na interes di e ciudadano Hulandes cu ta parti di uno di e comunidadnan den Reino.
Aruba ta scoge su Gobierno pa medio di eleccion, cu ta un sistema legal, y cada gobernante di Aruba ta mara na ley den ehecucion di su tarea, mescos cu ta e caso cu cada representante di e pais, eligi directamente pa Pueblo, cu ta Parlamento.
E poder Hudicial ta independiente di mundo politico den gobernacion y asina ta asegura cu husticia ta wordo haci cu tur miembro di e comunidad Arubano, cu no solamente den casonan penal, pero tambe den caso civil por busca su derecho contra Gobierno mes si ta necesario.
Pa percura pa gobernantenan y henter e funcionamento di gobernacion ta realmente di acuerdo cu Ley y bienestar di pais y habitante, Colegionan Halto a wordo introduci,
Lamentablemente na Aruba, mescos cu ta e caso na hopi pais, falta di conocemento di e forma cu e pais ta wordo goberna, ta haci cu instancianan importante di democracia, no ta conoci pa Pueblo di e pais.
Aruba conoce tres Colegio Halto di Estado. Nan ta Parlamento, Raad van Advies y Algemente Rekenkamer Aruba.
Debi na e hecho cu Parlamento ta consisti di politiconan eligi, e miembronan tin popularidad cu miembronan di e otro organonan halto di Aruba no ta disfruta. Hasta ta parce den bista di Pueblo cu tanto Parlamento como Gobierno ta superpoderoso, pero esaki no ta berdad, pasobra democracia ta defende Pueblo contra tendencia superpoderoso, cu ta igual na dictadura.
Raad van Advies y Algemene Rekenkamer Aruba ta vigila e trabou legislativo di gobernacion di Aruba, cu ta conta cu control di Algemene Rekenkamer Aruba, cu ta wordo yama e Tribunal di Cuenta di Aruba.
Lamentablemente falta di conocemento di e funcionamento real di e pais, ta pone politiconan eligi pa Pueblo na un lugar, cu no ta e lugar berdadero di un democracia cu ta mara tur hende na Ley.
No ta mundo politico ta dicidi pa e bienestar di Aruba pero e cuadro di Ley di Aruba cu ta stipula exactamente kende por actua como gobernante di e pais y na cual forma democratico.
Pa Pueblo por controla su Gobierno, conocemento di Ley ta inevitabel y ta sigur parti di trabou di prensa, di Sindicatonan, di Camara di Comercio y tur organisacion cu ta parti di Pueblo.
Control di Gobierno ta deber di tur ciudadano pa asina sigura cu gobernacion di Pueblo di Aruba ta realmente democratico y na interes directo di e pais.
Den e cuadro aki mas importancia y publicidad mester wordo duna na e voz di Colegionan Halto di Estado, cu tin den man e siguranza cu Aruba ta realmente un pais democratico.
Esaki sigur ta exigencia despues cu na 1986 Aruba a haya su Status Aparte a base di e lucha di Betico Croes, cu a uza e esencia legal di Aruba, pa crea un pais autonomo den Reino, manera a bira realidad dia Prome di Januari 1986.
