"Mester bin un mihor maneho di vivienda aki na Aruba"

ORANJESTAD (AAN): Dialuna Otmar Oduber a tene un conferencia di prensa dilanti di e proyecto Caribbean Town di cual el a bisa cu ta un proyecto sumamente importante.

“Motibo pakico nos ta akinan awe ta pa sigui elabora riba e enorme scarcedad di vivienda cu tin actualmente na Aruba”.

Na 2018-2019 nos a bin cu un manera caminda cu a cuminza ‘haal in’ tur e hendenan na DIP cu pa añanan largo tabata atrasa, cuminzando for di 1992 y 1993.

Na 2019 ora cu mi a bandona e posicion di minister di Infrastructura, nos a logra te na aña 2012, segun Oduber, kende a indica cu a logra kita un 15 pa 16 aña di atraso cu tabata tin e tempo ey.

El a splica cu hopi hende a cay afo y door di nan edad no por haya un prestamo pa un cas, pero cu awor ta mira cu tur cos ta stagna atrobe.

 “Na DIP tur cos ta para y ta como si fuera cu nan ta den un coma completo y lamentablemente ningun tereno mas a sigui wordo otorga”.

Tampoco tin un proyecto y vision di Gobierno of DIP pa mira pa dilanti con pa yuda di yena e scarcedad aki cu tin pa cas aki na Aruba.

Scarcedad di cas ta pasobra tin un scarcedad di tereno, segun e ex mandatario.

El a sigui bisa cu e tempo ey a traha un ‘verkavelingsplan’ nobo cu por a pone cu por a duna casi 2000  tereno.

“Nos a cuminza cu proyectonan cu ta bay ariba, pasobra cierto momento nos a realiza cu no tin tereno pa sigui duna”.

Lamentablemente ora cu mi a bay busca un tiki mas leu  mi a constata cu na DIP tin alrededor di 7000 pa 9000 hende ainda ta registra y ora cu e proyectonan aki a cuminza, lamentablemente ni 2000 hende a wordo acerca, lagando un grupo di entre 5000 pa 6000 hende afo, cu por yega na un posibel adkisicion di un vivienda den un proyecto asina manera Caribbean Town, cu ta un proyecto estilo nobo y algo completamente nobo pa Aruba.

Esaki segun Oduber kende a splica cu e proyecto aki ta uno unda cu Gobierno ta pone un tereno erfpacht disponibel pa un desaroyador prepara cas nos hendenan.

Segun Oduber tabata tin mas di e proyectonan aki rond di hospital y den e area di Eagle, caminda cu si a duna e tempo ey terenonan pa condominiums wordo bendi cu hendenan di afo pa miyones.

“E tempo ey nos a cambia e maneho di ROPV y e intencion tabata pa full e area ey bira uno pa traha casnan pa nos propio hendenan di clase medio of halto, pero cu akinan mes por cumpra nan propio cas na Aruba, den un edificio asina, segun Oduber.

El a sigui bisa cu actualmente na Aruba lamentablemente e scarcedad di vivienda ta pa miles di hende, esta miles di famia cu ta biba den un camber ainda cerca mama of papa, creando tur e problemanan social.

“Dos of tres yiu drumi den mesun camber cu mama y tata, cu ta crea tambe e presion riba nos comunidad y nos no ta mira cu algo ta wordo haci, desde 2020”.

Esaki segun e ex minister, kende a indica cu tur hende sa cu actualmente e prijsnan ta asina halto cu pa mayoria hende ta dificil pa cumpra un cas manera tabata haci antes, pasobra no tin un maneho dirigi pa evita cu e casnan ta wordo bendi na hendenan di afo cu kier haci negoshi na Aruba.