Segun Directora di DIMP, Luenne Gomez-Pieters:
ORANJESTAD (AAN): Den entrevista recien cu DIARIO, Directora di DIMP, Luenne Gomez-Pieters a remarca cu e discusionnan cu si e-steps, e bikes etc por core riba careteranan publico, ta un topico cu mester atende cu ne y trece claridad pa nos comunidad. El a agrega cu tabatin hopi accidente y suceso causa door di e vehiculonan aki y nan ta un peliger riba nos careteranan publico.
Sinembargo, e pregunta ta keda, unda si e vehiculonan aki por core mirando cu tin comerciantenan cu ya tin nan inversion haci den e vehiculonan aki. Mester bin un maneho pa e comerciantenan aki por guia nan clientenan cu ta huur e vehiculonan aki unda si nan por core.
Ademas di esaki, señora Gomez-Pieters a duna di conoce cu Departamento di Impuesto no por cobra pa plachi di number pa e vehiculonan aki pasobra aunke cu nan tin un motor, nan no ta cay bou di e categoria di vehiculo di motor y no ta pasa keuring di DTI.
El a agrega cu mester tin mas cooperacion entre e departamentonan concerni pa no laga ciudadanonan drenta cu e vehiculonan aki pa haci negoshi mientras no tin permiso pa ta riba caretera publico. E ta conseha tambe tur comerciante cu kier inverti den e vehiculonan aki, pa puntra prome sea Gobierno of instancianan concerni kico ta e reglanan pa tene cuenta cu ne prome cu haci e inversion.
Un cos ta sigur, el a enfatisa, cu e trabou di Departamento di Impuesto ta pa percura cu tur comerciante cu ta haci negoshi riba nos isla, contribui na impuesto riba nan ganashi. Y si nan no ta contribui, ta trabou di DIMP ta pa investiga nan y registra nan den sistema di DIMP. Incluso, e negociantenan cu tin negoshi cu E-Bikes, E-Steps etc. cu segun e, den un forma of otro, lo bay contribui na impuesto riba nan ganashi cu e vehiculonan aki.
Señora Gomez-Pieters a menciona cu DIMP ta den contacto cu e comision pa yega na un plan concreto, cu coordinacion cu Minister di Husticia cu ta encabesa e parti di siguridad riba nos careteranan publico.
