Randolf Vrolijk di FEPA
ORANJESTAD (AAN): Desde cu e refineria di Lago Oil & Transport Company a cera su portanan na final di 1985, e tempo ey na Aruba a crea varios programa di “Om-, Bij-, en Heromscholing Programa” pa yuda re-educa trahadornan di Refineria pa nan por bay drenta den por ehemplo, mercado di horeca pa por haya empleo.
Ta un asombro cu awor 36 aña despues, ainda keto bay e mesun sistema aki ta vigente na Aruba. Esey no ta bon! Na 2021 a trata na cambia hopi di e programa ey pa bin cu productonan nobo, y a base di necesidad di comunidad!
Randolf Vrolijk di Fundacion Enseñanza Pa Aruba (FEPA) a bin ultimo añanan ta duna curso riba diferente tereno. Y e spectrum di e cursonan a sigui wordo amplia. Ta yudando varios persona cu curso, y esaki ta un exigencia no djis di e mercado laboral local, sino tambe comunidad cu kier ta na altura di tur cos, y e desaroyo internacional ta hungando un rol eynan.
Segun Vrolijk, e tereno di enseñanza ta exigi cu bo mester duna otro tipo di educacion.
Pero di algun instancia local, Fundacion FEPO a haya masha poco feed-back riba e tema aki. Sinembargo nan mes a haci investigacion y a base di esey a bin cu varios curso cu awendia a yuda hopi hende haya un empleo.
Toch e hecho cu aña tras aña Gobierno ta sigui duna mesun tipo di curso, uno tras di otro, dado momento esaki ta satura e sistema. Dado momento tin di puntra, kico realmente mester pa comunidad.
Ora cu e Pandemia di Covid-19 a bati na porta di Aruba, e pregunta hopi grandi tabata: “Kico a dal mas duro? E pandemia of e falta di conocemento?” Pasobra tin di corda cu mas di 70% di ciudadanonan na Aruba no a caba un estudio secundario, pues ya caba bo tin un handicap den nivel di inteligencia eynan. Pues di cada 10 persona cu ta cana rond, 7 pa 8 persona no a logra un diploma di scol secundario.
Esey kiermeen cu Gobierno y Fundacion FEPA, mester ta preocupa y critico pa sa con ta bay sigui. Pasobra a papia di un ‘Kenniseconomie’ cu te ainda awor na 2022 no a wordo logra.
Durante Pandemia di Covid-19 a ripara ta cuanto hende a perde trabao, y cuanto hende despues ora tur cos a normaliza, no tabata kier a bay haci e mesun trabao bek. E ora Fundacion FEPO a cuminza cu programanan cu antes tabata wordo duna, hunto cu programanan nobo pa yuda hendenan haya chens di cambia di carera. Si acaso un dia atrobe Pandemia surgi, y su abo ta un ciudadano cu tin 2 of 3 profesion, lo bo no tin hopi problema pa haya trabao bek despues.
Na Aruba, hopi hende den mundo di horeca a perde trabao, y nan no tabata sa “unda pa gara”. Bon mes cu Gobierno a bin cu subsidio di FASE y asina varios hende a keda independiente di esey. Aunke esey ta un paso cu lo pone hendenan bira demasiado dependiente di algo pa sobrevivi.
Di berdad como pais, bo tin responsabilidad pa prepara bo hendenan pa nan bay den mercado laboral y crea oportunidadnan. Esey ta deber di cada pais. Exactamente esey ta loke FEPA a trata di haci ultimo añanan. Sinembargo segun Randolf Vrolijk, nan so no por haci esey. El a agrega cu e cooperacion di Gobierno tampoco no ta grandi, y e ta spera cu esey den aña 2023 lo bay aumenta, unda lo duna nan hopi mas chens di organiza mas curso.
Ta berdad cu ta bay anuncia esey awor na October caba, y cu lo bay cuminza cu cursonan gratis pa adultonan mayor, y demas grupo di enfoque, y proyectonan di Veilige Barios. Seugun Randolf Vrolijk, otro aña tambe lo bay start cu ‘Volksuniversiteit Aruba’, cu of sin yudanza di Gobierno, unda lo bay tin un mercado di cursonan masha grandi mes, unda lo traha cu paisnan Latino y Hulanda riba esey.
