Director di Arubus Eddy Mohamed:
ORANJESTAD (AAN) – Director di Arubus, Eddy Mohamed, siguiendo cu e tema di Aruparking durante un entrevista, el a menciona cu tin doñonan di vaknan geel cu ta pagando constantemente, pues nan no a stop di paga.
E vaknan geel ta destina pa esnan cu ta paga nan vergunning. Aworaki, door cu no tin sancion, hopi hende ta staciona den e vaknan geel, pero nunca e ley a cambia. Djis no por a reforce pa diferente motibo.
Mohamed ta pidi pueblo pa esnan tin vergunning por sigui para den vaknan geel y esnan cu no tin vergunning pa paga un, of no para den vaknan geel.
Aruparking a cuminza controla tur auto cu ta para di manera ilegal y ta pega sticker. Mohamed a remarca cu tin lugarnan destina pa parkeer, y esey ta un di e motibonan principal pakico Aruparking a bin den existencia; regula parkeo rond den centro di ciudad, pa asina facilita e ciudadanonan pa yega na comercio, pa yuda e tiendanan den caya tambe.
Ora hendenan ta para auto di manera ilegal, mester di un sancion, y aworaki Aruparking ta pega sticker pa concientiza nan.
El a subraya cu mayoria hende sa e ley y unda mag para y unda no. Lamentablemente, Aruparking no tabata den full operacion pa un temporada largo pero aworaki nan ta cuminzando y den futuro cercano lo ta den full operacion, y esaki ta un noticia hopi positivo, segun director di Arubus Eddy Mohamed.
