Frans Ponson di CUA:
ORANJESTAD (AAN): Stranheronan cu ta haciendo negoshi cu Airbnb ta creciendo mas y mas den e ultimo añanan. Segun señor Frans Ponson di CUA, Gobierno di Aruba ta na haltura di esaki y den nan evento recien, Gobierno a expresa cu nan ta atendiendo cu esaki caba. El a remarca cu Gobierno a informa cu den menos di tres luna lo mester tin informacion concreto. Sinembargo, señor Ponson a bisa, cu nan no ta na haltura di e detayenan ainda.
El a menciona cu Gobierno mester proteha ciudadanonan local cu tin negoshi di Airbnb. Entre otro, por cobra impuesto na tarifanan hopi mas halto of hacie 100 porciento pa stranheronan cu ta bin haci negoshi di Airbnb na Aruba. Tambe no otorga mas di un Airbnb pa un stranhero. Esakinan ta posibilidad cu por yuda.
Señor Ponson a remarca cu e mes no ta contra Airbnb pasobra e ta trece hopi oportunidad di trabao pa nos localnan. Pero e punto principal ta keda con nos ta proteha e viviendanan pa nos localnan, especialmente pa nos hobennan y pa Arubianonan hoben cu a bay studia afo. Segun e, hasta nos hobennan aki na Aruba y esnan cu ta studiando afo, tin e preocupacion di vivienda.
“Kico e solucion ta, nos no sa. Pero si e ta un topico cu ta rekeri pa Gobierno sinta na mesa cu tur esnan concerni entre otro cu hotelnan, vacation rentals, manera ya nan a indica cu nan lo haci den un evento recien di CUA. Mi ta kere cu ya esaki ta un bon comienso. Gobierno mester cuminsa haci e cambionan cu nan a papia di dje. E cambionan aki mester bin pasobra si no haci e cambionan, Gobierno lo por perhudica full un pais, vivienda, cas, construccion, negoshi, tur ciudadano etc”, el a expresa.
