Directora di DIMP señora Luenne Gomez-Pieters:
ORANJESTAD (AAN): Ainda tin hopi ciudadano cu ta maneha nan vehiculo cu plachi di number falso den trafico. Entre esakinan tin e plachi di number bieu cora cu blanco y blauw cu blanco, plachi di number bieu cu sticker pega riba dje, plachi di number cu hende mes ta traha. Tambe hopi ciudadano ta busca nan set di plachi di number di auto y ta pega nan riba dos diferente auto pa asina paga un impuesto so pa aña.
Directora di Departamento di Impuesto (DIMP) señora Luenne Gomez-Pieters, den un entrevista cu DIARIO a informa cu DIMP tin un proyecto digital cu ta den su fase di ehecucion cu lo yuda controla plachi di number na un manera mas eficiente. Ya e departamento a sinta cu e team di trafico di KPA pa presenta e sistema digital, un app.
Di nan banda, KPA a duna feedback indicando con nan ‘Surveillance teams’ lo por haci bon uzo di e informacion cu e app aki ta duna.
Señora Gomez-Pieters a indica cu e app ta un aplicacion actualisa di e app anterior. Por hinca e number di auto den e sistema y esaki ta duna informacion necesario pa "Surveillance teams" haci su control. Entre otro por saca informacion di number di chasis, color di e auto, y e bouwjaar. El a remarca cu e sistema no ta saca nomber y adres of otro informacionnan personal. E app ta sirbi principalmente pa e Surveillance teams wak si e plachi di number di auto cu nan ta controla ta registra bao di auto ey.
“Plachi falso di number, entre otro cu sticker, plachi di number bieu of cu hende mes ta traha, y tambe uzo di un registracion di plachi di number riba dos diferente vehiculo, no ta aceptabel. Esaki ta un forma ilegal di bypass nos sistema di impuesto. Cu e informacion di e app aki, Polis lo controla con e vehiculo of number di auto ta registra den sistema di DIMP”, señora Gomez-Pieters a duna di conoce.
