Mientras Foro Economico Mundial a afirma necesidad di seriedad politico
- El a uni na AVP den e canto di Avestruz y entrada di supervision Hulandes
- Huelga di hamber di Mike tabata simbolo di e hamber destina pa Pueblo
ORANJESTAD (AAN) Cu na 2024 Aruba por spera basta ola den su piscinanan politico, ta algo pa cual DIARIO a adverti for di basta dia.
Na e momento cu tur instancia mundial ta adverti pa temponan exigente pa politiconan cu kier sirbi nan pais awe y den futuro imediato, Mervin Wyatt kier causa furor politico aparentemente, si e informacionnan cu nos ta ricibi di lectornan indiga, ta cuadra cu berdad.
Segun e informacionnan ricibi, awe Mervin Wyatt, lo kier un entiero digno pa Florin y lo ta busca asistencia di Pueblo pa medio di declaracionnan den cual e ta trata na haci Aruba comprende, cu ta su partido actual, AVP, ta defensor di Florin.
Mervin Wyatt, a splica Aruba cu su partido, AVP, lo sali na defensa di e cartera di Pueblo manera semper e partido a haci.
Loke Wyatt no a splica ta, kico e ta comprende bou bon maneho financiero di un pais sigur si e ta splica Pueblo, cu su partido dirigi pa Mike Eman, ta e solucion financiero pa Aruba.
Aparentemente mester splica Wyatt cierto realidadnan di e partido AVP, di cual el a bay forma parti na 2013, despues di a bandona fila di MEP, cu tabata su porta pa drenta mundo politico di Aruba.
E salida di Wyatt di MEP pa AVP na 2013, a exigi tur atencion di Aruba, na momento cu Avestruz a forma su neishi, segun rapportnan oficial cu den Corte di Husticia, Huez a splica cu mas exactitud.
Na e momento cu Wyatt a dicidi pa AVP, e partido berde tabata parti di un fiesta, den cual placa a lora segun Huez, pero tambe den cual e Florin Arubiano, a drenta ansia di morto na man di Mike Eman.
Tabata un tempo di hopi actividad politico diferente na loke hende lo a spera di un bon maneho pa Pueblo riba tur tereno y cu finalmente a conoce yegada di Hulanda, cu mester a baha Mike for di Fort Zoutman, caminda el a dicidi cu e ta prefera di muri di hamber cu perde su popularidad politico, cu sigur a bay perdi ora Hulanda a splica Aruba kico Mike a haci cu placa di Aruba.
Awe Wyatt, ta bisa Pueblo cu su partido lo defende bienestar di Pueblo.
Kico Wyatt ta ofrece Aruba lo ta bini dilanti den e promesa cu partido AVP lo bolbe entrega Aruba, e maneho cu a wordo hiba den pasado y a causa un desaster financiero pa Aruba, cu awe mester paga debe nacional, mester paga proyectonan PPP pero tambe a wordo perhudica den e forma di escandalonan gubernamental.
Cu partido di Wyatt ta den problema, tur hende por comprende pero cu awe kier cumpra curazon di Aruba cu loke a destrui Aruba, cu tabata e gobierno cu Wyatt a bay sostene, ta duna prueba di e forma cu den mundo politico hopi biaha, ta acerca Pueblo.
Si tin un partido cu a causa daño serio na e situacion actual y futuro di Aruba, ta e partido cu Wyatt a bay sostene na 2013, na momento cu Hulanda tabata na caminda pa Aruba, pa baha Mike Eman for di Fort Zoutman.
Aruba a perde su cara den noticia internacional y tur e publicacionnan di e hazaña di Mike Eman cu no a muri di hamber pero si a causa agonia di e Florin Arubano, a causa desastre na Aruba, cu awe cu cambio di e maneho di e partido di Wyatt y Eman, ta bira ehempel den Reino.
Na 2013 Wyatt a habri su alanan pa uni su mes na e partido di Mike. Esaki ta nifica cu na Juni di 2023, el a celebra su segundo lustro como miembro di e partido di Mike, cu a percura cu na 2024, Aruba ta celebra e segundo lustro di e momento cu Plasterk a baha Mike for di Fort Zoutman y Aruba a perde e posicion financiero cu e tabata tin den Reino.
Esaki ta loke Wyatt kier como defensa di e Arubiano? Esaki ta e promesa di partido di Wyatt na caminda pa eleccion 2025?
Ora mira atras loke e trahador Arubiano mester paga pa e fiesta family and friends di e partido di Wyatt den gobernacion, manera a bini dilanti hasta den Sala di Corte di Husticia, ta resta solamente un pregunta.
Unda berguensa a keda, Wyatt? Trata na sikiera haya confiansa di Pueblo atrobe cu otro promesa. Regreso di e maneho di Mike, ta morto di Florin di Aruba.
