Dia di Betico 2024 ta bira un celebracion historico pa Pueblo di Aruba
- Gobierno Wever Croes a corona propio moneda y Banco Central Aruba
- Sin autonomia monetario Aruba no por a haci husticia cu e Arubiano
ORANJESTAD (AAN) Preparacionnan ta wordo haci pa celebracion di Dia di Betico, cu na 2024 a bira un celebracion historico pa Pueblo di Aruba, cu bou guia di Betico Croes no solamente a reconstrui e base estatal di Reino Hulandes, pero na mes momento a entrega un prueba cu como isla chikito compara cu Hulanda, por realisa e base mas importante cu democracia conoce.
E prome factor cu a haya atencion den e proceso cu DIARIO a sigui den e ultimo dianan, tabata kico democracia realmente ta encera y con esaki a wordo alcansa cu Status Ap[arte, cu no sin mas tabata un separacion di Aruba for di Antia.
Democracia no ta un proceso cu mester entrega un forma pa haci politica y crea poder politico pa un grupito, pero ta e forma pa e deseo di Pueblo wordo realisa.
E palanca di democracia ta keda, cu e hende cu su identidad, su opinion di loke ta su felicidad, cu propio cultura a base di su historia, ta dicidi pa e base di su comunidad, cu ta realmente un forma den cual e ta comparti su identidad y asina su necesidad cu mester conduci na su felicidad, cu otro.
Aruba cu su lucha pa Status Aparte a duna prueba na Reino y na mundo cu e tabata tin razon.
Cu Betico Croes no a entrega na Aruba un lucha imaginario den cual e ta e factor principal, a keda demostra na un forma historico.
Betico Croes a uni e Pueblo di Aruba den un lucha tenaz den cual el a duna e ehempelnan mas grandi di sacrificio y entrega y no a permiti pa capricho personal di su persona como lider di un movecion nacional, dicidi kico ta contenido di Status Aparte.
Ora Aruba a enfrenta Reino finalmente na 1983, Reino no por a hala atras ya cu Aruba cu asistencia di su mihor expertonan, a entrega Reino e documentacion di Status Aparte, basa riba Orden di Ley, democracia y e exigencianan di e mihor gobernacion democratico posibel, tabata hancra.
Esaki tabata e trabou di Betico Croes cu no a hiba un lucha egoista cu bienestar pa su persona, pero hunto cu un team y apoyo di talento di e gran mayoria di Arubiano, a regla tur factor importante den e bida di un Arubiano.
Na e momentonan cu mundo ta den un crisis y Reino Hulandes mes no por cera su presupuesto na un forma corecto, Gobierno Evelyn Wever-Croes ta entrega na mundo e exito di Status Aparte di Aruba, cu a bira modelo pa Reino Hulandes regla futuro estatal di resto di Reino cu den su mayoria, a bay contra Status Aparte.
Betico Croes como lider y un microfono di expresion di e deseo di e Pueblo di Aruba, a entrega Aruba e base di loke mester a bira felicidad di e Pueblo Arubano, cu a haya su propio Florin y su propio Banco Central pa asina hiba e maneho financiero na interes di e Arubiano.
Na 2024 Gobierno Evelyn Wever-Croes a honra y duna contenido na e gran logro di Status Aparte di Betico Croes, na momento cu Pueblo di Aruba ta celebra Dia di Betico como pais ehempel di bon maneho financiero.
Dos Gobierno Evelyn Wever-Croes, cu a hereda un caos financiero y un Aruba cubri cu deshonor den Reino, confronta cu pandemia, cu peliger di recesion mundial y awor peliger di guera mundial, ta celebra Dia di Betico Croes cu e Pueblo di Aruba den un recuperacion economico pero tambe como ehempel di bon maneho financiero y monetario pa Reino y asina ta garantisa stabilidad pa e pais.
E Florin di Aruba maneha pa e Banco Central di Aruba, cu tabata e obstaculo grandi den negociacionnan cu Betico Croes a dirigi, awe den man di Gobierno Wever-Croes cu a duna continuacion na e realidad di e lucha pa Status Aparte, ta e moneda cu ta sostene e maneho monetario, financiero y economico, mas sano den Reino Hulandes, loke ta e baluarte mas importante di un pais cu kier papia di democracia y autonomia.
Dia di Betico Croes 2024 ta bira un celebracion di e logro historico di gobernacion di Aruba y entrega cu e Pueblo di Aruba guia pa Betico Croes no a busca un aventura politico pa medio di e pais autonomo Aruba.
2024 ta entrega e prueba cu Betico Croes a dirigi Aruba den e buskeda di e exigencia mas halto di democracia, cu ta cu un pais no ta biba na rudia pero a base di responsabilidad di su dirigentenan, den e caso aki Gobierno Evelyn Wever-Croes, ta percura pa e contenido realmente democratico y autonomo den cual e caracter y identidad di e Arubiano, ta keda central!
