Mercado y feria di agricultura hopi exitoso na Santa Rosa tambe cu bishita di intercambio cu Curaçao

ORANJESTAD (AAN) – Na Departamento di Agricultura, Pesca, Cria y Bestia (LVV/Santa Rosa) a tuma lugar e di dos mercado y alavez un feria na cual a asisti representantenan di LVV Curacao tambe.

   Señor Gersittsan Duran, encarga cu e proyecto di agricultura y bestia na LVV Curacao, a splica cu nan a bin cu tres cabrito chubato di un raza cu no tin na Aruba y Aruba ta manda tres cabrito chubato di e raza di Aruba cu no tin na Curacao.

   Duran a expresa cu esaki ta un intercambio den cual tur dos Isla ta sali beneficia. E meta di ambos isla ta, traha pa mehora e raza di nan bestianan local door di cruza nan cu esnan di raza.

   Tambe señora Eva Wever di Arubiano tabata presente cu e saconan cu cinco aña pasa nan a cuminza produci y el a bisa cu nan a wak e necesidad di uni cu Aruba su cunukeronan, y mescos cu nan ta custumbra di bin cu henter un concientizacion pa proteccion di pahra y di naturaleza, nan kier promove Aruba su agricultura. Durante di e pandemia nan a enfoca hopi riba seguridad alimenticio, y agricultura y como cu nan ta haci concientizacion a ripara cu hopi hende y mucha ta uza nan saconan cu ta bisa “ban cuida nos pahranan, ban cuida nos naturaleza” y pesey nan ta haciendo esaki tambe cu agricultura, pa fomenta plantacion awe pa cosecha mañan.

   E saconan aki ta degradable y duradero, pues bien pa nos medio ambiente, y tur hunto ta hacie cu e ta e prouducto pa Santa Rosa. Ta saconan di un bida di mas di cuater aña y reusable, di manera cu no mester uza saconan di plastic cu ta toxico pa nos medio ambiente.

   Tambe e director interino di Agricultura, Medio Ambiente y Naturaleza di Curacao, señor Gabriel Murray, a bin Aruba, den cuadro di un intercambio relaciona cu “food security” riba locual nan ta cerando un acuerdo hopi grandi. El a splica cu el a bin riba invitacion di LVV Aruba ya cu nan ta trahando hopi cu Aruba y e otro Islanan di Caribe. E meta ta pa produci propio alimentacion, importa unda cu por y coopera entre e islanan.

   Minister Ursel Arends tambe a hiba palabra y a mustra contento di mira tanto habitante cu a bishita e feria na Santa Rosa. Esaki ta e di dos mercado y e ta mira cu e acogida cerca nos ciudadanonan ta hopi bon. E mandatario a expresa cu e ta spera cu den futuro por sigui engrandece e mercado aki, mirando e diferente productonan di nos propio agriculturnan, locual ta yuda crece Aruba su economia tambe.