E peor pesadiya di narcotraficantenan
ORANJESTAD (AAN): Manera ta conoci, President Donald Trump di Merca a aproba pa manda unidadnan militar Mericano pa parti zuid di Lama Caribe, cu e meta pa blokea y stop traficacion di cocaina cu ta sali for di paisnan manera Colombia of Venezuela.
Entre e unidadnan cu Pentagon di Merca a aproba, ta varios avion di patruya maritimo multi-mision P-8A Poseidon fabrica pa e unidad militar di Boeing, cu ta specializa den e guera anti-submarino, guera anti-superficie, trabao di inteligencia, vigilancia, y reconocemento, como tambe search and rescue.
Ta trata di un variante di P-8 Poseidon cu a wordo usa door di US Navy, y ya nan tin 125 modelo di e tipo aki.
Den parti di Caribe, mayoria vigilancia riba lama for di aire ta wordo haci door di avionnan di Forza Aeroespacial Colombiano, tambe avion di Wardacosta di Caribe Hulandes, avion di unidadnan di AMO di Customs and Border Protection di Merca cu sede na Puerto Rico.
Hopi hende ta conoce e modelo antes di Orion P-3, pero awor segun Defense Department di Merca, e avion P-8A Poseidon a reemplaza e Orion debi cu e tin mas potencia na su capacidadnan.
Ta conoci cu narcotraficantenan ta uzando awor semi-submergibel cu casi no por wordo mira ta move riba lama, como cu mayoria di e boto ta bao di superficie. Pero cu e guera anti-superficie (yama ASUW), e avion P-8A Poseidon ta capaz di yuda pa asina localiza cualkier boto, sea speedboat tipo Go-Fast, of boto tipo Yola, of cualkier semi-submergibel, y tambe submarino chikito cu narcotraficantenan ta uzando den Lama Caribe.
Pasobra aworaki submarinonan cu narcotraficantenan ta uzando, lo por ta wordo maneha via remote-control via di antenna di recepcion di Internet manera Starlink. Cu yudansa di e avion P-8A Poseidon, e lo bay bira mas facil pa detecta nan riba lama grandi. E avion por bula te cu 41.000 pia halto, cu velocidad maximo di 490 konopi (907 km/h).
E avionnan aki por keda bula hopi largo sin cu mester ateriza, debi cu avionnan tankero por bula hunto cu ne y yena su tanki cu jetfuel.
