Rusia lo bende Citgo na Merca y su interesnan na Venezuela? --- *Petrocaribe di Chavez y Aruba cu por a uni na imperio Nicolas --- *Compania Mericano Chevron ta permiti Nicolas sigui landa
ORANJESTAD(AAN)—Algun dia pasa ya DIARIO a aborda e tema di e situacion cu a presenta na Venezuela for di momento cu e Coronavirus nobo a bati na porta y atencion di mundo a wordo kita for di e realidad Venezolano.
Covid-19 a topa Venezuela colga entre dos presidente, Nicolas Maduro y Juan Guaido, cu no a participa na e ultimo eleccion di Asamblea Nacional di Venezuela cu a habri porta pa un confusion estatal cu e Coronavirus nobo a tene den scuridad.
Si Juan Guaido por a fungi como Presidente Interino di Venezuela pa un cantidad basta grandi di pais na mundo, tabata debi na e hecho cu e tabata presidi e Asamblea Nacional di Venezuela.
Na prome momento despues di e ultimo eleccionnan pa Asamblea Nacional di Venezuela, Union Europeo a bisa cu e no por acepta Juan Guaido mas como presidente pasobra e no a participa na e eleccion, pero despues a sigui considera Juan Guaido como Presidente di Venezuela.
Pa casonan oficial paisnan cu ta miembro di Union Europeo, manera Hulanda, ta atende cu Nicolas Maduro, cu na final di 2021 a dicidi di cera porta pa Union Europeo.
Mientrastanto Juan Guaido tin Citgo na Merca, cu ta considera Juan Guaido Presidente di Venezuela, pero awor Joe Biden a manda un representante Mericano pa papia cu regimen Nicolas Maduro, cu a cumpli y a pone dos detenido cu tabata parti di gerencia di Citgo den libertad.
Kico ta pasa realmente dilanti porta di Aruba? Kico por spera di e situacion na Venezuela, caminda placa a caba y Nicolas Maduro a sclama cu sin medida di Merca e pais por a gana fortuna cu petroleo?
Kico e representante di Presidente Biden a atende cu Nicolas Maduro no ta conoci. En todo caso e representante di Merca mes por splica Husticia na Merca awor unda e por topa cu tur e fugitivonan di Husticia Mericano, cu a pone recompensa pa esnan cu por conduci na detencion di regimen di Nicolas Maduro, cu ta wordo acusa dor di autoridad Mericano di cantidad di crimen.
Te caminda DIARIO por a sigui e situacio unico na Venezuela, na 2021 ainda Saab a wordo absolvi di persecucion pa labamento di placa na Merca, pero e lo ta wordo persigui awor pasobra aparentemente el a crea occasion pa laba placa.
E pregunta grandi ta bira awor si porta ta habri pa asina Nicolas Maduro por sigui cu su negoshi di petroleo cu Hugo Chavez a uza pa crea mas amigo den region di Caribe pa medio di su PetroCaribe, cu ta nifica prijs mas barata pa e paisnan den Caribe.
Den e epoca cu Nicolas Maduro tabata partner di Gobierno Mike Eman na Aruba, el a mustra cu Aruba a habri porta pa e expande su imperio di refineria den e region di Caribe.
Aruba tin motibo pues pa vigila kico lo pasa den porta su cas na Venezuela.
Siman pasa DIARIO a informa Aruba cu Gobierno di Merca a duna permiso na Chevron, cu ta e ultimo compania Mericano envolvi den negoshi di petroleo na Venezuela, pa keda na e pais di Maduro.
Interesante ta e hecho cu awor tanto Nicolas Maduro como Juan Guaido a dicidi cu nan ta sigui negocia cu otro. Si esaki lo resulta den un Gobierno cu dos presidente den Palacio Miraflores no ta conoci.
Kico Hugo Chavez ta pensa di e hecho cu Merca ta parce di ta dirigi politica na su pais, no ta conoci. Asdrubal Chavez no a logra haya residencia na Aruba ora e proyecto di Citgo a fracasa na Aruba.
E pregunta grandi ta keda kico lo pasa cu Nicolas Maduro. Merca lo duna Nicolas chens pa bandona e pais? Kico Rusia lo haci? Rusia lo bende su parti den Citgo?
Pregunta y mas pregunta cu e situacion na Ukraine ta crea den porta di Venezuela.
