Wever-Croes y Maduro no mester a comparti nan exito cu Raiz
- Geoffrey Wever a acumula voto den Gabinete Wever-Croes
- Robo politico di Presidencia Parlamento ta base Gobierno nobo
ORANJESTAD (AAN) Algo sumamente serio a pasa den seno di Gobierno Evelyn Wever-Croes 2, cu abiertamente a bira victima di uno di e traicionnan politico mas bajo cu historia di Aruba a yega di conoce.
E poder ridiculo y contra principio democratico cu Raymicheline di RAIZ tabata profila, tabata destrutivo pa e realidad democratico di un coalicion, cu hamas por a existi sin e cantidad di asiento di MEP.
RAIZ tabata un partido chikito, cu mester a aporta cu solamente dos asiento den Parlamento den creacion di un Gobierno mayoritario pa MEP. Pues loke por conclui den esaki ta, cu MEP cu tabata tin un mesa di tres pata a base di resultadonan di eleccion 2021, kier a uza RAIZ como e pata cu tabata falta pa papia di un Gobierno mayoritario.
Ora den e sistema politico democratico papia di mayoria, ta papia di e realidad cu ta e deseo di e mayoria di poblacion ta wordo cumpli.
Un realidad cu Raymicheline aparentemente no por a mira den e postura politico arogante di su persona cu sin duda a aporta na e hecho cu Raiz a perde sosten di Pueblo hasta pa e por bolbe Parlamento di Aruba.
For di momento cu Raymicheline a haya oportunidad via porta patras di e sistema democratico di ta parti di coalicion di Aruba, MEP mester a bati alarma y na prome lugar splica e partido cu a tira RAIZ pa e mata crece den sombra di MEP, cu RAIZ no por dirigi Gobierno pasobra ningun momento Pueblo di Aruba a entrega Raiz e mando riba e pais.
Ta den e coalicion cu MEP como base y e reputacion cu Reino Hulandes for di prome cu cambio di Gobierno na 2021 a entrega na Gabinete Evelyn Wever-Croes pa a bolter e destruccion di Aruba dor di Mike Eman den un caminda nobo pa Aruba, RAIZ por a profila su mes den Gobierno pa na final RAIZ presenta su mes como traidor, cu nunca MEP mester a acepta.
Conociendo politica como el a demostra di ta den tanto caso na mundo, MEP na momento cu a bira conoci cu Geoffrey Wever ta baila paso doble y ta bay cu e derivado di AVP, cu ta Futuro, mester a exigi pa Geoffrey Wever bandona e stul di Ministro cu e tabata ocupa na nomber di RAIZ, ya cu esaki ta contra etica y etica cu ta basa riba norma y balornan di Aruba, no ta permiti pa Geoffrey Wever a sigui come di dos mesa, manera idioma di Pueblo ta yama e situacion cu a surgi den Gobierno di Aruba.
Esaki tabata e fayo grandi di MEP, cu mester a exigi Raiz pa otro persona bira Ministro na lugar di Geoffrey Wever, cu ya como representante oficial y hasta dirigente di Futuro, tabata representa oficialmente Gobierno di MEP y asina a base di su funcion como Ministro, por a sigui acumula voto pa su persona cu proyectonan cu e tabata realiza.
Aki no ta papia di acto ilegal pero ta papia di e realidad politico, caminda (manera na tanto oportunidad DIARIO a splica), Geoffrey Wever cu a bira lider di un partido cu ta contra Gobierno Wever-Croes, tabata funciona como Ministro, haciendo uzo di tur loke e Gobierno Evelyn Wever-Croes tabata haci posibel, pa haya voto y realiza proyectonan costoso na entre otro Oranjestad y San Nicolas.
E stul di Ministro cu e cantidad di voto di MEP a logra na eleccion 2021, a haci posibel pa Geoffrey Wever goberna, tabata e centro di oficina di Geoffrey Wever cu mester a haya voto pa su partido nobo FUTURO di cual e tabata co-lider.
Den tur esaki, MEP a base di traicion di RAIZ a perde su forza y den Parlamento di Aruba, robo politico a tuma lugar ora RAIZ a tuma posicion di Presidente di Parlamento cu su dos asientonan den Parlamento cu nunca riba nan mes, por a duna RAIZ e oportunidad pa presenta e Presidente di Parlamento.
A base di cooperacion politico cu MEP cu tabata tin e mayoria den Parlamento, RAIZ por a traiciona a base di kiebra di palabracion den e acuerdo pa Gobierno, e acuerdonan cu e tabata tin cu MEP.
A base di traicion RAIZ por a forma un mayoria nobo den Parlamento, cu uzo di e voto di un delincuente condena, cu ta Benny Sevinger, pa kibra Gobierno Evelyn Wever-Croes, mientras RAIZ tabata haci posibel pa Geoffrey Wever como lider di FUTURO, cu e tempo un solo voto den Parlamento, como Ministro di Gobierno Wever-Croes realiza plannan cu el a uza den campaña como candidato di Futuro, como su logronan…
2024 a entrega na Aruba un panorama sumamente tristo di loke politica por encera y con voto di Pueblo por wordo uza pa destrui e voz di Pueblo cu na 2021 a duna MEP e mayoria pa goberna y asina recupera e Aruba cu awe e destructornan di Aruba presente den ex miembronan di AVP den Futuro y AVP mes, ta bira Gobierno nobo di Aruba!
