Mike como Prome Ministro lo sostene financiadornan AVP condena??
- Baluartenan di AVP ta uni despues cu Benny a baha Wever-Croes
- Historia di 1985 ta ripiti na vispera di Avestruz den Corte Supremo
ORANJESTAD (AAN) Aña 2024 ta yega su final cu un Aruba na caminda pa un futuro cu ta depende totalmente di loke Reinol Hulandes lo dicidi pero tambe a base di ripiticion di e historia di 1985, ora e forma con placa mester sigui lora, a bira e arma di AVP pa deshaci di Betico Croes politicamente mientras na 1986 Betico Croes a wordo hiba na su ultimo lugar di descanso.
Despues di e entrega total di e Pueblo di Aruba na un lucha pa recupera di e abuso financiero cu Mike Eman a comete contra Aruba y cu a haci cu Hulanda a introduci supervision cu medidanan fuerte pa scapa Aruba di bancarota, e sistema politico di Aruba ta wordo cuestiona atrobe.
Kico ta futuro di e Ley di Integridad di Aruba cu a cera porta pa ripiticion di casonan manera Caso Avestruz cu ta culmina na momento cu Caso Avestruz ta wordo corona den formacion di un Gobierno nobo?
Pa Aruba a bay eleccion na 2024 tabata tin necesidad di e voto di Benny Sevinger, cu a wordo condena na castigo di prison dor di Huez y Corte superior pero a bay den Casacion loke a haci posibel pa Benny Sevinger como condenado cu castigo di prison, por ta ainda parti di Parlamento di Aruba.
E voto di Benny Sevinger den Parlamento tabata necesario pa partidonan cu participantenan cu a kibra cu AVP aparentemente despues di e condena di Benny Sevinger y e mantencion di Benny Sevinger den Parlamento dor di Mike Eman, por a manda Gobierno Evelyn Wever-Croes cas.
Un situacion politico sumamente serio ta presenta actualmente na Aruba, cu pa medio di e dos gobiernonan di Mike Eman, a perde su cara como pais caminda reglanan democratico y di moral politico tabata vigente.
Na momento cu Mike Eman a haya opportunidad pa goberna, Pueblo di Aruba a bira victima di logronan scondi di gruponan cu a keda desconoci manera tur cu a wordo beneficia pa medio di e proyectonan di Bo Aruba, pa cual awe tur trahador mester paga den suma total di Belasting.
Sumamente tristo tabata e scandalnan politico cu a rementa na Aruba y cu a duna prueba con Gobierno Mike Eman a perhurdica e Arubiano cu no por a haya por ehempel tereno pa construi su cas, mientras Benny Sevinger tabata reparti tereno na poderosonan di partido AVP manera a bini dilanti den Corte di Husticia.
Awe Aruba ta ricibi un bofta den su cara na momento cu a bira conoci cu e partido cu a lanta ora Gerlien Croes a crea e indicacion cu e tabata contra e forma cu Mike Eman a defende y sostene Benny Sevinger, ta uni cu Mike Eman atrobepa asina su partido FUTURO y AVP haya mayoria den Parlamento y forma Gobierno.
For di prome cu eleccion ya Pueblo di Aruba a bati alarma pa informacionnan cu un grupo di AVP a kita aparentemente for di AVP pa por a reuni den e partido di Gerlien Croes pa asina despues di eleccion bolbe reuni den AVP, cu cada bez cu e tabata den Gobierno a produci scandalnan cu a condena gobernantenan di AVP na prison.
Mike Eman a sostene presencia di Benny Sevinger den Parlamento, e representacion di Pueblo di Aruba, aunke Huez a condena Benny Sevinger na castigo di prison hunto cu grupo poderoso di sostenedornan financiero di AVP.
Na 2025 Caso Avestruz ta continua den Corte, despues cu Benny Sevinger pa motibo di sentencia di Huez y di Corte Superior no por participa na eleccion ya cu e sentencia di Huez no ta permiti presencia di Benny Sevinger den Parlamento.
Parlamento di Aruba durante 2024 a pone integridad na disputa y awor cu AVP y Futuro ta uni na mesa di negociacion pa reforma Gobierno, preguntanan serio ta surgi.
Cu Futuro a cambia su posicion enfrente Benny Sevinger den Parlamento pa asina Benny Sevinger cu su voto den Parlamento a haci posibel pa Raiz, Gerlien, AVP , sin motibo real causa caida di Gobierno Wever-Croes y proclama eleccion nobo, tabata mas cu obvio pero awor ta wordo confirma pa e forma cu Futuro ta uni cu AVP y Gerlien y Mike ta bay forma Gobierno.
E pregunta mas valido den e caso aki ta, si Futuro ta sostene Caso Avestruz di mes forma cu Mike Eman ta sostene pasobra esaki ta necesario si Mike tin mando cu su nuebe asientonan den Parlamento, di Gobierno di Aruba y Benny Sevinger hunto cu sostenedornan financiero di AVP envolvi den Caso Avestruz, busca nan libertad cerca Corte Supremo na Hulanda, despues cu Corte superior a condena nan na prison!
