ORANJESTAD (AAN): E ta un momento sweet & sour pa su pashentnan! Di un banda nan ta contento cu Dr. Luchmun
ta bay goza awor di su pensioen bon mereci, pero di otro banda nan lo bay sinti falta di un Docter cu a trata nan bon pa asina hopi aña, y mas.
Via di Asociacion HAVA di Docternan di Cas, DIARIO a tuma nota cu Dr. Raynold Luchmun a skirbi un carta dirigi na tur su pashentnan.
Den e carta, Dr. Luchmun ta informa su pashentnan cu e ta tuma e oportunidad pa gradici nan pa tur e aña cu a pasa hunto den momentonan feliz y tristo. “Mi a trata di haci lo mihor posibel, y esaki a yuda nos tur bay den bon momentonan, pero desafortunadamente tambe cosnan bon tin su final.”
El a finalisa bisando: “Mi ta desea boso tur bon salud y un bon cooperacion cu mi sucesornan.”
Asociacion HAVA Aruba tambe ta expresa palabranan di danki na Dr. Luchmun pa e trabao incansabel desposita den cuido di su pashentnan.
AZV a splica cu entrante e luna aki, tur pashent di Dr. Luchmun lo traspasa pa e sistema di ImSan HOED (Huisdokter Onder Één Dak) na Pastoor Hendrikstraat 10. Tene cuenta cu un parti di e grupo lo pasa pa Docter di Cas Dr. N. Bos, y e otro parti ta pasa pa e Docter di Cas Dr. A. Blanca.
https://diario.aw/categories/noticia/general/mensahe-di-dr-luchmun-cu-e-luna-aki-a-baha-cu-pensioen#sigProId970c1b513e
